என்னது, 2026ல் விஜய்தான் முதல்வரா? – திரைப்பட காட்சியில் வைரலாகும் போஸ்டர்…

தமிழ் சினிமாவில் உச்ச நட்சத்திரமாக விளங்கி வரும் நடிகர் தளபதி விஜய், தற்போது அரசியல் களத்தில் முழுமையாக ஈடுபட உள்ளார். இதன் காரணமாக, அவர் தனது சினிமா பயணத்தை நிறைவு செய்ய முடிவு செய்துள்ளார். அவர் நடிப்பில் உருவாகி வரும் கடைசி திரைப்படம் ‘ஜனநாயகன்’ ஆகும். இந்த திரைப்படத்தை இயக்குநர் ஹெச். வினோத் இயக்குகிறார். விஜய்யுடன் இணைந்து பூஜா ஹெக்டே, மமிதா பைஜூ, கவுதம் வாசுதேவ் மேனன், பாபி தியோல், ப்ரியாமணி, நரேன் உள்ளிட்ட பலர் முக்கிய கதாப்பாத்திரங்களில் நடித்துள்ளனர்.

‘ஜனநாயகன்’ படத்தின் படப்பிடிப்பு சமீபத்தில் நிறைவடைந்தது. வரும் 2026ம் ஆண்டு பொங்கல் திருநாளை முன்னிட்டு இந்த திரைப்படம் திரையரங்குகளில் வெளியிடப்படும் என அதிகாரப்பூர்வமாக அறிவிக்கப்பட்டுள்ளது. தளபதி விஜயின் கடைசி திரைப்படமாக இருக்கும் இதை ரசிகர்கள் மிகுந்த ஆவலுடன் எதிர்நோக்கி காத்திருக்கின்றனர்.

விஜயின் அரசியல் வருகையைத் தொடர்ந்து நாடு முழுவதும் பல்வேறு விவாதங்கள் நடைபெற்று வருகின்றன. திரைப்படத்திலிருந்து அரசியலுக்கு வந்துள்ள விஜய், தற்போது தமிழக வெற்றிக் கழகத்தின் தலைவராக செயல்பட்டு வருகிறார். சமீபத்தில் நடைபெற்ற கட்சி செயற்குழுக் கூட்டத்தில், 2026ம் ஆண்டு நடைபெறும் தமிழக சட்டமன்றத் தேர்தலில் முதலமைச்சர் வேட்பாளராக தளபதி விஜய்தான் அறிவிக்கப்பட்டார்.

இந்நிலையில், “2026ல் விஜய் முதலமைச்சராகிறார்” எனக் கூறும் போஸ்டர் ஒன்று சமூகவலைத்தளங்களில் வைரலாகி வருகிறது. இது, நடிகர் அப்புக்குட்டி நடித்துள்ள “யாதும் அறியான்” திரைப்படத்தின் ட்ரைலரில் இடம்பெற்ற காட்சியில்தான் வெளியாகியுள்ளது. நேரத்தை மையமாகக் கொண்டு உருவாக்கப்பட்ட இந்த திரைப்படத்தின் ட்ரைலர் நேற்று வெளியாகியது. ட்ரைலரில் காணப்படும் ஒரு காட்சியில், “2026ல் விஜய் முதல்வர் ஆகிவிட்டார்” என தெரிவிக்கும் போஸ்டர் இடம்பெற்றுள்ளது. இதையடுத்து, விஜயின் அரசியல் பயணத்தை உறுதி செய்யும் வகையில் ரசிகர்கள் சமூக வலைதளங்களில் கருத்துக்களை பகிர்ந்து வருகிறார்கள்.