ரன்வீர் சிங்கிற்கு வாட்ஸப்பில் மிரட்டல் – கோடிக்கணக்கில் பணம் கேட்டு பரபரப்பு 🚨

சமீப காலமாக பாலிவுட் பிரபலங்களை குறிவைத்து நடைபெறும் தாக்குதல் மற்றும் மிரட்டல் சம்பவங்கள், திரையுலகில் பெரும் பதற்றத்தை ஏற்படுத்தி வருகின்றன. அந்த வரிசையில், சமீபத்தில் பிரபல இந்தி திரைப்பட இயக்குநர் ரோஹித் ஷெட்டி வீட்டின் மீது மர்ம நபர்கள் துப்பாக்கிச் சூடு நடத்திய சம்பவம் நாடு முழுவதும் அதிர்ச்சியை ஏற்படுத்தியது. இந்த சம்பவம் தொடர்பாக போலீசார் பலரை கைது செய்து தீவிர விசாரணை மேற்கொண்டு வருவதாக தகவல்கள் வெளியாகின.

இந்த நிலையில், தற்போது நடிகர் ரன்வீர் சிங் பெயரும் ஒரு புதிய சர்ச்சையில் சிக்கியுள்ளது. ரன்வீர் சிங்கிற்கு வாட்ஸப்பில் மிரட்டல் செய்தி வந்துள்ளதாக தகவல் வெளியாகி, பாலிவுட் வட்டாரங்களில் பரபரப்பை ஏற்படுத்தியுள்ளது. அந்த மிரட்டல் செய்தியில், கோடிக்கணக்கான பணம் வழங்க வேண்டும் எனக் கேட்டு, ஒரு வாய்ஸ் நோட் அனுப்பப்பட்டதாக கூறப்படுகிறது.

இந்த தகவல் வெளியானதைத் தொடர்ந்து, ரன்வீர் சிங் மற்றும் அவரது மனைவி நடிகை தீபிகா படுகோன் வசித்து வரும் வீட்டிற்கு பலத்த போலீஸ் பாதுகாப்பு ஏற்பாடு செய்யப்பட்டுள்ளது. துப்பாக்கி ஏந்திய காவலர்கள் பாதுகாப்புப் பணியில் ஈடுபடுத்தப்பட்டுள்ளதாகவும், அவர்களின் பாதுகாப்பு மேலும் அதிகரிக்கப்பட்டுள்ளதாகவும் தெரிவிக்கப்பட்டுள்ளது.

மிரட்டலை அனுப்பிய நபர் யார், அதன் பின்னணியில் யார் உள்ளனர், இது உண்மையான அச்சுறுத்தலா அல்லது போலியான மிரட்டலா என்பதைக் கண்டறிய போலீசார் பல்வேறு கோணங்களில் விசாரணை நடத்தி வருகின்றனர். தொடர்ச்சியாக நடைபெறும் இத்தகைய சம்பவங்கள், பாலிவுட் பிரபலங்களின் பாதுகாப்பு குறித்து மீண்டும் கடும் கவலைகளை எழுப்பி, திரையுலகில் அச்சநிலையை உருவாக்கியுள்ளது.