பாக்ஸ் ஆபிஸில் ‘படைத்தலைவன்’ – 5 நாட்களில் செய்த வசூல் எவ்வளவு தெரியுமா?

தென்னிந்திய திரையுலகில் வளர்ந்து வரும் இளம் நடிகர்களில் ஒருவர் சண்முக பாண்டியன். முன்னாள் நடிகரும் அரசியல்வாதியுமான கேப்டன் விஜயகாந்தின் இளைய மகனான இவர், 2015 ஆம் ஆண்டு வெளிவந்த சகாப்தம் திரைப்படத்தின் மூலம் ஹீரோவாக தமிழ்த் திரைப்படங்களுக்கு அறிமுகமானார்.

இதனைத் தொடர்ந்து, அவர் நடித்த படம் மதுர வீரன். இத்திரைப்படத்திற்குப் பிறகு சண்முக பாண்டியன் நடிப்பில் எந்தவொரு திரைப்படமும் வெளிவராமல் சுமார் ஏழு ஆண்டுகள் கடந்தன. இந்த நீண்ட இடைவெளிக்குப் பிறகு, அவர் மீண்டும் நாயகனாக நடித்துள்ள புதிய திரைப்படம் தான் படைத்தலைவன். இப்படத்தை அறிமுக இயக்குநரான அன்பு இயக்கியுள்ளார். இசைஞானி இளையராஜா இப்படத்திற்கு இசையமைத்துள்ளார். கடந்த வாரம் வெளியான இப்படத்திற்கு ரசிகர்களிடம் இருந்து சுமாரான வரவேற்பு கிடைத்துள்ளது.

இந்நிலையில், படைத்தலைவன் திரைப்படம் திரையரங்குகளில் வெளியான 5 நாட்களில் பாக்ஸ் ஆபிஸில் ரூ. 4.4 கோடி வரை வசூல் செய்துள்ளதாக தகவல் வெளியாகியுள்ளது. இதன் அடிப்படையில், வரும் நாட்களில் இப்படம் மேலும் எவ்வளவு வரவேற்பைப் பெறும் என்பதை பொறுத்திருந்து காத்திருக்க வேண்டிய நிலை உள்ளது.