விஜய் சேதுபதியின் புதிய படத்தில் கைகோர்த்த தனுஷ் பட நடிகை!

கடந்த ஆண்டு “மகாராஜா” மற்றும் “விடுதலை 2” ஆகிய இரண்டு வெற்றிப்படங்களை வழங்கிய நடிகர் விஜய் சேதுபதி, தற்போது “தலைவன் தலைவி” என்ற புதிய திரைப்படத்தில் நடித்து முடித்துள்ளார்.

இத்திரைப்படம் இயக்குநர் பாண்டிராஜ் இயக்கத்தில் உருவாகியுள்ளது. இதில் நடிகை நித்யா மேனன் கதாநாயகியாக நடித்துள்ளார். சமீபத்தில் இப்படத்தின் பாடல்கள் வெளியிடப்பட்டு, ரசிகர்களிடையே நல்ல வரவேற்பைப் பெற்றன. “தலைவன் தலைவி” திரைப்படத்தை தொடர்ந்து விஜய் சேதுபதி, தற்போது இயக்குநர் பூரி ஜெகநாத் இயக்கும் புதிய படத்தில் நடித்து வருகிறார். இந்த படத்தை பூரி ஜெகநாத் மற்றும் நடிகை சார்மி கவுர் இணைந்து தயாரிக்கின்றனர். படப்பிடிப்பு தற்போது முழு வீச்சில் நடைபெற்று வருகிறது.

இதுவரை இந்த படத்தில் கதாநாயகியாக யார் நடிக்கிறார்கள் என்பதைப்பற்றி எந்த அறிவிப்பும் வெளியாகவில்லை. இந்நிலையில், பிரபல நடிகை சம்யுக்தா மேனன் இப்படத்தில் கதாநாயகியாக நடிக்கிறார் என்பதை படக்குழு அதிகாரப்பூர்வமாக அறிவித்துள்ளது. மலையாள திரை உலகில் பல படங்களில் நடித்துள்ள சம்யுக்தா மேனன், தமிழில் தனுஷ் நடித்த “வாத்தி” திரைப்படம் மூலம் அறிமுகமானார். தற்போது ராகவா லாரன்ஸ் நடிக்கும் “பென்ஸ்” படத்திலும் அவர் முக்கிய வேடத்தில் நடித்துவருகிறார் என்பது குறிப்பிடத்தக்கது.