டிரெண்டிங் திரைப்படம் – திரை விமர்சனம்..

தமிழ் சினிமாவில் தரமான கதைகளை தேர்ந்தெடுத்து நடித்து வரும் கலையரசன், தனது சமீபத்திய படமான “ட்ரெண்டிங்” மூலம் இன்றைய சமூகத்தின் மிகப்பெரிய பிரச்சனையாக உருவெடுத்துள்ள சோசியல் மீடியா மோகத்தை திரையில் விவாதிக்க வந்துள்ளார். இயக்குநர் சிவராஜ் இந்தப் படத்தை இயக்கியுள்ளார். படத்தின் கதைக்களம் இவ்வாறு செல்கிறது. கலையரசனும் ப்ரயாலயாவும் இன்றைய ட்ரெண்டி தம்பதியாக, தங்களது காலை முதல் இரவு வரை செய்யும் ஒவ்வொரு செயலைவும் ரீல்ஸாக மாற்றி இன்ஸ்டாகிராம், யூடியூப் போன்ற சமூக ஊடகங்களில் பதிவேற்றும் ஜோடியாக காட்சியளிக்கின்றனர்.

ஒருநாள் திடீரென இவர்களது சேனல்கள் அனைத்தும் நீக்கப்படுகின்றன. இதனால் இந்த தம்பதிக்கு நிதியளவில் பெரும் சிக்கல்கள் உருவாகின்றன. வாங்கிய வீட்டுக்கான கடன் தலையில் இடியாக விழும் நிலையில், அவர்களுக்கு ஒரு ஆன்லைன் ரியாலிட்டி ஷோவிலிருந்து அழைப்பு வருகிறது. அந்த நிகழ்ச்சியின் விதிமுறைகள் மிகவும் சுவாரசியமாக அமைந்துள்ளன. 7 நாட்கள் அவர்கள் தங்களது வீட்டிலேயே இருக்க வேண்டும். நிகழ்ச்சியாளர்கள் கூறும் நான்கு டாஸ்க்குகளை அவர்கள் வெற்றிகரமாக முடித்தால் 2 கோடி ரூபாய் பரிசாக வழங்கப்படும் என கூறப்படுகிறது.

பெரும் பணம் மற்றும் கடன் சுமையை தீர்க்கும் வாய்ப்பு என நினைத்து இந்த தம்பதியினர் இந்த டாஸ்க்குகளில் ஈடுபடுகிறார்கள். ஆனால் அந்த டாஸ்க்குகள் மெல்ல மெல்ல அவர்களின் உண்மை முகங்களை வெளிக்கொணர ஆரம்பிக்கின்றன. இயக்குநர் சிவராஜ், பிக்பாஸ் மற்றும் ஸ்க்விட் கேம் ஆகிய இரண்டையும் இணைத்து உருவாக்கியிருக்கும் இந்தக் கதைக்களம், இன்றைய சமூக ஊடக அடிமைகள் மீது சுட்டிக்காட்டுகிறது. கலையரசனும் ப்ரயாலயாவும் கதைக்கு உகந்த தேர்வாக உள்ளனர்.

படத்தில் ஒரு முக்கியமான காட்சி, கலையரசன் தனது மாமனருக்கு விபத்து என ப்ரயாலயாவிடம் கூறும் தருணம். அதனை நம்பிய ப்ரயாலயா, அவரை பேச வைத்து ரெட் பட்டனை அழுத்த செய்கிறார். இது யூடியூபில் வெறும் சிரிப்பு தரும் வீடியோக்கள் தயாரிக்கும் தம்பதிகளின் மறுபுறத்தை வெளிக்கொணர்கிறது. படத்தின் வசனங்கள் பல இடங்களில் பாராட்டுக்குரியதாக உள்ளன. குறிப்பாக, “நமக்குத் தேவையான தருணத்தில் கடவுள் வராமல் பேய் வந்தாலும், நாம் அந்த பேயையே கொண்டாடுவோம்” போன்ற வரிகள் கவனத்தை ஈர்க்கின்றன.

முதல் பாதியில் டாஸ்க்குகள் என்னவாக இருக்கும் என்ற எதிர்பார்ப்பு வைக்கின்றது. ஆனால் இரண்டாம் பாதியில், ஒரு கட்டத்திற்கு மேல் “இதுல என்னப்பா இருக்கிறது?” என்ற எண்ணத்தை ஏற்படுத்துகின்றது. ஒருவரின் உண்மையான முகம் தெரிய வரும் இடங்களும், அதனால் ஏற்படும் சண்டை, பின்னர் புரிதல் என கதைக்களம் நகர்கிறது. ஆனால் அதன் பின்னர் கலையரசன் எடுக்கும் முடிவுகள், மனித இயல்புகளைக் காட்டினாலும், சிறிய அளவிலேயே சோர்வை ஏற்படுத்துகின்றன. கிளைமாக்ஸில் வரும் டாஸ்குகள் பணம் மனிதர்களை எவ்வளவு வீழ்ச்சி அடையச் செய்யும் என்பதை கருப்பு பக்கமாக திரையில் கொண்டு வந்துள்ளன.

இன்றைய இணையவழி வீடியோக்களின் மோகம், லைக்குகள், சப்ஸ்கிரைப்கள், அவற்றால் கிடைக்கும் பணம் என அனைத்தையும் ஒரே கட்டத்தில் இழுத்து, அவை இல்லை என்றால் மனிதர்கள் எவ்வாறு மாற்றம் அடைகின்றனர் என்பதைக் காட்டி இந்தப் படம் முடிகிறது. ஒரே வீடு மற்றும் இரண்டு முக்கிய கதாபாத்திரங்கள் கொண்ட இப்படத்தில் ஒளிப்பதிவு சிறப்பாகவே உள்ளதாக சொல்லலாம். சாம் சி எஸ் இசை இப்படத்திற்கு பெரிய பலமாக அமைகிறது.

வலுவான அம்சங்கள்:

• கதையின் முதன்மை கரு.
• கலையரசன் மற்றும் ப்ரயாலயா நடித்த விதம்.
• வசனங்கள் மற்றும் பின்னணி இசை.

பலவீனங்கள்:

• கதை ஒரே இரண்டு பேரை சுற்றி நகர்வதால், சில இடங்களில் மாறுபாடு இல்லாத உணர்வு.
• இரண்டாம் பாதியில், பரபரப்பு குறைந்து சற்று சலிப்பை ஏற்படுத்துகிறது.

முடிவுரை:
இன்றைய இணைய உலகத்தின் சீர்கேடுகளை துணிவாக காட்சிப்படுத்தியதற்காக, சில குறைகள் இருந்தாலும் “ட்ரெண்டிங்” என்ற படத்தை பாராட்டவேண்டும்.

மதிப்பீடு: 2.75 / 5