குபேரா படத்தின் பட்ஜெட் மற்றும் முதல் நாள் வசூல் கணிப்பு இதோ!

இந்த வாரம் ஜூன் 20ஆம் தேதி, தனுஷ், ராஷ்மிகா மந்தனா, நாகார்ஜுனா, பாக்கியராஜ் உள்ளிட்ட முன்னணி நடிகர்கள் நடித்துள்ள ‘குபேரா’ திரைப்படம் உலகம் முழுவதும் வெளியாகவிருக்கிறது. இந்தியாவில் மட்டும் 3000 திரைகளிலும், வெளிநாடுகளில் 1000 திரைகளிலும் படம் வெளியிடப்படுவதால் மொத்தம் 4000 திரைகளில் படம் திரைக்கு வரவுள்ளது.

இப்படத்தை இயக்கியுள்ளார் இயக்குநர் சேகர் கம்முலா. 2000ஆம் ஆண்டு ‘டாலர் ட்ரீம்ஸ்’ படத்தின் மூலம் இயக்குநராக அறிமுகமான இவர், கடந்த 25 ஆண்டுகளில் மிகுந்த பொறுமையுடன் வெறும் 9 படங்களையே இயக்கியுள்ளார். அவரது தனித்துவமான இயக்க பாணியில், சினிமாவுக்குத் தேவையான விஷுவல்ஸ் வரும் வரை எதையும் ஆவலுடன் செய்யாமல் நிதானமாக காத்திருப்பது குறிப்பிடத்தக்கது.

சேகர் கம்முலா இயக்கிய முன்னாள் திரைப்படங்களில் ஆனந்த், கோதாவரி, ஹேப்பி டேஸ், லீடர், லைஃப் இஸ் பியூட்டிஃபுல், அனாமிகா, ஃபிடா, லவ் ஸ்டோரி ஆகியவை உள்ளன. இவற்றிற்குப் பிறகு அவரது 10வது திரைப்படமாக ‘குபேரா’ உருவாகியுள்ளது. இந்த படத்தின் தயாரிப்புப் பட்ஜெட் ரூ.100 கோடியாகவும், விளம்பரங்கள் மற்றும் ப்ரமோஷன்களுக்கு மட்டும் ரூ.20 கோடி செலவிடப்பட்டுள்ளதாக தகவல்கள் தெரிவிக்கின்றன. மொத்தமாக, ரூ.120 கோடி செலவில் ‘குபேரா’ படம் தயாரிக்கப்பட்டுள்ளதாக டோலிவுட் வட்டாரங்கள் கூறுகின்றன.

தனுஷ் சம்பளம் ரூ.30 கோடி!: ‘குபேரா’ படத்தில் நடித்ததற்காக தனுஷ் ரூ.30 கோடி வரையிலான சம்பளத்தை பெற்றுள்ளதாக தகவல்கள் வெளியாகியுள்ளன. நாகார்ஜுனாவுக்கு ரூ.7 கோடி, ராஷ்மிகா மந்தனாவுக்கு ரூ.3 கோடி சம்பளமாக வழங்கப்பட்டதாகவும் கூறப்படுகிறது. இந்த படத்தின் தொழில்நுட்பக் குழுவின் சம்பளங்களை தவிர்த்து வைத்தால், சுமார் ரூ.50 கோடிக்கும் குறைவான செலவில் இப்படம் உருவாகியிருக்கும் எனக் கணிக்கப்பட்டுள்ளது.

இசை மற்றும் பாடல்கள்: தேவி ஸ்ரீ பிரசாத் இசையமைத்துள்ள இந்த படத்தில் ‘போய் வா நண்பா’ என்ற பாடல் ரசிகர்களிடையே ஏற்கனவே பெரும் வரவேற்பைப் பெற்றுள்ளது.

டிக்கெட் முன்பதிவு துவக்கம்: ‘குபேரா’ படத்தின் டிக்கெட் முன்பதிவு ஹைதராபாத்தில் உள்ள அனைத்து திரையரங்குகளிலும் தொடங்கியுள்ளது. ஆனால் சென்னையில் இதுவரை வெறும் நான்கு திரையரங்குகளில் மட்டுமே முன்பதிவு தொடங்கப்பட்டுள்ளது. இன்று இரவு அல்லது நாளை முழுக்க சென்னையிலும் அனைத்து திரையரங்குகளிலும் முன்பதிவு தொடங்கும் என எதிர்பார்க்கப்படுகிறது.

முதல் நாள் வசூல் எதிர்பார்ப்பு: மொத்தம் 4000 திரைகளில் வெளிவரும் ‘குபேரா’ திரைப்படம், முதல் நாளில் தமிழ்நாட்டில் மட்டும் ரூ.10 கோடியைத் தாண்டும் வசூலை பெறும் என எதிர்பார்க்கப்படுகிறது. அதேபோல, ஆந்திரா மற்றும் தெலுங்கானாவிலும் ரூ.10 முதல் ரூ.12 கோடி வரை வசூலாகும் என கணிக்கப்படுகிறது.

திரைப்படத்தின் கதை மற்றும் ஸ்கிரீன்ப்ளே ரசிகர்களை ஈர்த்தால், தனுஷுக்கான மிகப்பெரிய பாக்ஸ் ஆபிஸ் வெற்றி படமாக இது அமையும் எனத் தொழில்நுட்ப வட்டாரங்கள் தெரிவித்துள்ளன. கடந்த காலங்களில் ராஷ்மிகா நடித்த திரைப்படங்கள் அதிகபட்சமாக ரூ.500 கோடி வரை வசூலித்துள்ளதை முன்னிட்டு, இத்திரைப்படத்திற்கும் அதிக எதிர்பார்ப்பு உருவாகியுள்ளது. ஆனால், படம் தியேட்டர் பார்வையாளர்களை கவரத் தவறினால், முதல் மூன்று நாட்களுக்குப் பிறகு வசூல் வீழ்ச்சி ஏற்படலாம் என்பதும் நினைவில் கொள்ளத்தக்கது.