கூலி திரைப்படத்தின் முதல் விமர்சனம் வெளியானது! படம் எப்படி இருக்கிறது?

ரசிகர்கள் மிகுந்த ஆவலுடன் எதிர்பார்த்துக் காத்திருந்த லோகேஷ் கனகராஜ் மற்றும் சூப்பர்ஸ்டார் ரஜினிகாந்தின் கூட்டணி, ‘கூலி’ திரைப்படத்தின் மூலம் நிஜமாகியுள்ளது. இந்த திரைப்படத்தில் ரஜினிகாந்துடன் இணைந்து நாகார்ஜுனா, சௌபின் சாகிர், ஸ்ருதி ஹாசன், சத்யராஜ் மற்றும் உபேந்திரா ஆகிய முன்னணி நட்சத்திரங்கள் நடித்துள்ளனர். இவர்களின் நடிப்பும், கதையின் திருப்பங்களும் படம் மீது பெரும் எதிர்பார்ப்பை ஏற்படுத்தியுள்ளது. மேலும், அனைவருக்கும் ஆச்சரியம் அளிக்கும் வகையில், இந்த படத்தில் அமீர் கான் கேமியோ ரோலில் நடித்துள்ளதாக தகவல் வெளியாகியுள்ளது. ரசிகர்கள், வருகிற ஆகஸ்ட் 14ம் தேதி திரையரங்குகளில் இப்படம் வெளியாக உள்ளதை கொண்டாடும் மனநிலையிலேயே உள்ளனர்.

இந்நிலையில், இப்படத்தின் இயக்குநர் லோகேஷ் கனகராஜ் சமீபத்தில் அளித்த பேட்டியில், ‘கூலி’ படம் குறித்து முக்கிய தகவல்களை பகிர்ந்துள்ளார். அவர் கூறியதாவது, “படத்தின் முதல் பாதி உணர்வுப்பூர்வமான டிராமாவாக அமையும். இடைவேளை காட்சியில் தான் ரஜினியின் முக்கியமான மாற்றம் நிகழும். அதன் பிறகு படம் முழுவதும் ஆக்ஷன் நிறைந்ததாக இருக்கும்,” என தெரிவித்துள்ளார்.

இதே நேரத்தில், ‘கூலி’ திரைப்படத்தை சூப்பர்ஸ்டார் ரஜினிகாந்த் அண்மையில் திரைமறைவில் பார்த்துள்ளார். படம் பார்த்தவுடன், “எனக்கு இன்னொரு தளபதி கொடுத்திருக்கீங்க லோகேஷ்,” என உணர்வுபூர்வமாக கூறியதாகவும், அவரை கட்டிப்பிடித்து பாராட்டியதாகவும் தகவல்கள் தெரிவிக்கின்றன. சூப்பர்ஸ்டாரின் இந்த முதல் விமர்சனம், படம் மீதான எதிர்பார்ப்பை மேலும் பலமடங்காக உயர்த்தியுள்ளது. ரசிகர்கள் தற்போது, ‘கூலி’ திரைப்படம் ஒரு அதிரடியான திரையரங்க அனுபவமாக அமையும் என நம்பிக்கை காட்டி உள்ளனர்.