விஜயின் பிறந்தநாள் விருந்தில் திரையுலக நட்சத்திரங்கள்..

தமிழ் சினிமாவின் முன்னணி நடிகர்களில் ஒருவராக வளர்ந்த நடிகர் விஜய், தற்போது அரசியலில் தனது பயணத்தைத் தொடங்கியுள்ளார். அரசியல் களத்தில் முழுமையாக ஈடுபட விரும்பும் அவர், சினிமாவை விட்டுவிலக உள்ளதாக அறிவித்துள்ளார். இதன் தொடர்ச்சியாக, தற்போது உருவாகி வரும் ‘ஜனநாயகன்’ திரைப்படமே அவரது கடைசி படம் என்பதையும் உறுதிப்படுத்தியுள்ளார்.

இந்தப் படத்தை இயக்கும் பொறுப்பை ஹெச். வினோத் வகிக்கிறார். கேவிஎன் நிறுவனம் தயாரிக்கும் இத்திரைப்படத்தில் நடிகர் விஜய்யுடன் பூஜா ஹெக்டே, மமிதா பைஜூ, ப்ரியாமணி, கவுதம் வாசுதேவ மேனன் மற்றும் பாலிவுட் நடிகர் பாபி தியோல் உள்ளிட்டோர் முக்கிய கதாபாத்திரங்களில் நடித்துவருகின்றனர். இசையமைப்பாளராக அனிருத் பணியாற்றுகிறார்.

நடிகர் விஜய்யின் பிறந்த நாளான கடந்த ஜூன் 22ஆம் தேதி, ‘ஜனநாயகன்’ திரைப்படத்திலிருந்து ஒரு சிறப்பு கிலிம்ப்ஸ் வீடியோ வெளியிடப்பட்டது. இந்த வீடியோ ரசிகர்கள் மத்தியில் பெரும் வரவேற்பை பெற்றது. அதே நாளில், நடிகர் விஜய் தனது பிறந்த நாளை கொண்டாடும் வகையில் ஒரு தனியார் விருந்தில் திரையுலகில் இருந்து பல பிரபலங்களை அழைத்து பார்ட்டி நடத்தியதாக தகவல்கள் வெளியாகியுள்ளது.