சூர்யா நிச்சயம் அரசியலுக்கு வர வேண்டும் – விழா மேடையில் கோரிக்கை வைத்த போஸ் வெங்கட்,,!!

நடிகர் சூர்யா நிச்சயம் அரசியலுக்கு வர வேண்டும் என பிரம்மாண்டமாக நடைபெற்ற கங்குவா இசை வெளியீட்டு விழாவில் நடிகரும் இயக்குநருமான போஸ் வெங்கட் தெரிவித்துள்ளார்.

சூர்யா நடிப்பில் சிறுத்தை சிவா இயக்கத்தில் உருவாகி உள்ள கங்குவா திரைப்படம் வரும் நவம்பர் 14 ஆம் தேதி திரையரங்குகளில் வெளியாக உள்ள நிலையில் நேற்று இப்படத்தின் இசை வெளியீட்டு விழா பிரம்மாண்டமாக நடைபெற்றது.

இந்த விழாவில் கங்குவா படக்குழுவுடன் சேர்ந்து ஏராளமான திரை நட்சத்திரங்கள் சிறப்பு விருந்தினர்களாக கலந்துகொண்டு சிறப்புரையாற்றினர்.

இந்நிலையில் இந்த விழாவில் கலந்துகொண்டு மேடையில் பேசிய நடிகரும் இயக்குநருமான போஸ் வெங்கட் கூறியதாவது :

ஒரு சூப்பர்ஸ்டார் ரசிகரை உங்களைப் போல் வழிநடத்த வேண்டும். தர்மம் செய்ய, உதவி செய்ய இப்போதே சொல்லி கொடுத்திட வேண்டும். அதற்கும் மேல் அறிவையும், படிப்பையும் கொடுக்க வேண்டும். பின்புதான் அரசியலுக்கு வர வேண்டும். ஒரு தலைவன் என்ன வேலை செய்ய வேண்டும் என்பது முக்கியமில்லை.

தலைவன் நடிகனாக, பேச்சாளராக, எழுத்தாளராக இருக்கலாம். ஆனால் தலைவனின் அடித்தளம் என்பது, அவனது ரசிகர்களை முட்டாளாக வைத்திருப்பது அல்ல, அவர்களை அறிவாளியாக வைத்திருப்பது. அவர்களின் அறிவை வளர்த்த பின் அரசியலுக்கு வர வேண்டும். அப்படிப் பார்த்தால் நீங்கள் (சூர்யா) அரசியலுக்கு வர வேண்டும். கமல் சாருக்கு பிறகு நுணுக்கமான உங்களை போன்ற நடிகரை பார்க்க முடியாது. இன்னும் நிறைய படங்கள் கொடுத்த பிறகு நீங்கள் அரசியலுக்கு வர வேண்டும் என போஸ் வெங்கட் தெரிவித்துள்ளார்.