பாஜக மூத்த தலைவர் அத்வானிக்கு பாரத் ரத்னா விருது அறிவிப்பு

பாரத ஜனதா கட்சியின் (பாஜக) மூத்த தலைவர் எல்.கே.அத்வானிக்கு மதிப்புமிக்க பாரத ரத்னா விருது வழங்கப்படுவதாக பிரதமர் நரேந்திர மோடி இன்று அறிவித்தார். இந்தியாவின் வளர்ச்சிக்கு அத்வானியின் பங்களிப்புகளை நினைவுச்சின்னம் என்று பிரதமர் மோடி வர்ணித்துள்ளார்.

இதுகுறித்து பிரதமர் மோடி எக்ஸ் தளத்தில் வெளியிட்டுள்ள ஒரு பதிவில், அத்வானியுடன் பழகியதையும் அவரிடமிருந்து கற்றுக்கொண்டதையும் பாக்கியமாக கருதுவதாக கூறியுள்ளார். மேலும், அவருக்கு பாரத ரத்னா விருது வழங்குவது தனக்கு மிகவும் உணர்ச்சிகரமான தருணம் என்று பிரதமர் மோடி கூறினார்.

அந்த பதிவில் அத்வானி நமது காலத்தில் மிகவும் மதிக்கப்படும் அரசியல்வாதிகளில் ஒருவர் என புகழாரம் சூட்டிய மோடி, மேலும், “பொது வாழ்வில் அத்வானியின் பல தசாப்த கால சேவையானது, அரசியல் நெறிமுறைகளில் ஒரு முன்மாதிரியான தரத்தை அமைத்து, வெளிப்படைத்தன்மை மற்றும் ஒருமைப்பாட்டுக்கான அசைக்க முடியாத அர்ப்பணிப்பால் குறிக்கப்பட்டது.

தேசிய ஒற்றுமை மற்றும் கலாச்சார மறுமலர்ச்சியை மேம்படுத்துவதற்கு அவர் இணையற்ற முயற்சிகளை மேற்கொண்டுள்ளார். அடிமட்டத்தில் பணியாற்றுவதில் இருந்து, நமது உள்துறை அமைச்சராகவும், தகவல் தொடர்பு துறை அமைச்சராகவும் துணை பிரதமராகவும் சிறப்பாக சேவை ஆற்றியுள்ளார். அவரது நாடாளுமன்ற செயல்பாடுகள் எப்பொழுதும் முன்மாதிரியாகவும், செழுமையான நுண்ணறிவுகள் நிறைந்ததாகவும் இருந்தன.” எனத் தெரிவித்துள்ளார்.