3 நாட்களில் ‘படைத்தலைவன்’ செய்த வசூல்… எவ்வளவு தெரியுமா?

கேப்டன் விஜயகாந்தின் இளைய மகன் சண்முகபாண்டியன், 2015ம் ஆண்டு வெளியான ‘சகாப்தம்’ திரைப்படம் மூலம் தமிழ்த் திரையுலகில் அறிமுகமானார். அதன் பிறகு அவர் ‘மதுர வீரன்’ திரைப்படத்தில் நடித்தார்.

இந்த இரண்டு படங்களுக்குப் பிறகு, சண்முகபாண்டியன் நடிப்பில் பல ஆண்டுகளுக்கு பின்னர் திரைக்கு வந்த திரைப்படமே ‘படைத்தலைவன்’. இந்தப் படத்தை அறிமுக இயக்குநர் அன்பு இயக்கியுள்ளார். இப்படத்தில் கஸ்தூரி ராஜா, முனிஷ்காந்த், யாமினி சந்தர் உள்ளிட்டோர் முக்கிய கதாபாத்திரங்களில் நடித்துள்ளனர். சிறப்பு அம்சமாக, இந்த திரைப்படத்தில் AI (கணினி நுண்ணறிவு) தொழில்நுட்பத்தின் மூலம் மறைந்த நடிகரும் அரசியல்வாதியுமான கேப்டன் விஜயகாந்த் திரையில் உயிர்ப்பிக்கப்பட்டுள்ளார். கடந்த வாரம் வெளியான இப்படத்திற்கு ரசிகர்கள் மத்தியில் ஓரளவான வரவேற்பு கிடைத்துள்ளது.

இந்த நிலையில், ‘படைத்தலைவன்’ திரைப்படம் திரைக்கு வந்த முதல் மூன்று நாட்களில் உலகளவில் ரூ.1.4 கோடிக்கு மேல் வசூல் செய்துள்ளதாக தகவல்கள் வெளியாகியுள்ளன. இதன் மூலம், சண்முகபாண்டியனின் திரும்பும் முயற்சிக்கு நல்ல வரவேற்பு கிடைத்திருப்பது குறிப்பிடத்தக்கது.