மகளிர் உலகக்கோப்பை சாம்பியன் ஹர்மன்பிரீத் கவுருக்கு சென்னையில் உற்சாக வரவேற்பு

சென்னை,
13-வது மகளிர் ஒருநாள் உலகக் கோப்பை கிரிக்கெட்டில் ஹர்மன்பிரீத் கவுர் தலைமையிலான இந்திய அணி 52 ரன் வித்தியாசத்தில் தென் ஆப்பிரிக்காவை வீழ்த்தி வரலாற்றில் முதல்முறையாக சாம்பியன் பட்டத்தை கைப்பற்றியது. 52 ஆண்டுகள் நீண்ட காத்திருப்புக்கு முற்றுப்புள்ளி வைத்த இந்திய வீராங்கனைகள் நாட்டின் பெருமையை உலக அரங்கில் உயர்த்தினர்.

இந்த வெற்றியை நாடு முழுவதும் கொண்டாடி தீர்த்தனர். பிரதமர் முதல் பிரபல நடிகர்கள் வரை அனைவரும் இந்திய மகளிர் அணிக்கு வாழ்த்துகள் தெரிவித்தனர். சமூக வலைதளங்களிலும் ரசிகர்கள் வெற்றியை பெருமையாக கொண்டாடினர்.

இதனைத் தொடர்ந்து, கேப்டன் ஹர்மன்பிரீத் கவுருக்கு சென்னையில் உள்ள ஒரு தனியார் பள்ளியில் சிறப்பு பாராட்டு விழா நடத்தப்பட்டது. அங்கு அவர் வருகையின்போது மேளதாளங்கள் முழங்க மாலை அணிவித்து உற்சாக வரவேற்பு அளிக்கப்பட்டது. பள்ளி ஆசிரியர்கள் ஆரத்தி எடுத்து பாரம்பரிய முறையில் வரவேற்றனர்.

பின்னர் ஹர்மன்பிரீத் கவுர் மாணவ, மாணவியர்களுடன் கலந்துரையாடி, வெற்றிக்கு வழிவகுத்த அனுபவங்களை பகிர்ந்து கொண்டார். மாணவிகள் இந்திய அணியின் ஜெர்சியை அணிந்து, உலகக் கோப்பை வெற்றிக்குப் பின் வீராங்கனைகள் கொண்டாடிய காட்சியை மீண்டும் மீட்டனர்.

அவரது வருகையால் பள்ளி முழுவதும் கொண்டாட்ட சூழ்நிலை நிலவியது. பலர் அவருடன் செல்ஃபி எடுக்க ஆவலுடன் திரண்டனர். ஹர்மன்பிரீத் கவுர், “இந்த வெற்றி இந்திய பெண்களின் உழைப்பும் தன்னம்பிக்கையும் உலகம் முழுவதும் வெளிப்படுத்திய தருணம்” என்று கூறியதும் அங்கு இருந்த அனைவரும் கைகொட்டி பாராட்டினர்.