பயிற்சியில் பந்துதாக்கி 17 வயது ஆஸி வீரர் பலி – கிரிக்கெட் உலகம் அதிர்ச்சி.

மெல்போர்ன், —
ஆஸ்திரேலிய கிரிக்கெட் உலகையே உலுக்கும் துயரச் செய்தி ஒன்று வெளியாகியுள்ளது. வெறும் 17 வயதான இளம் கிரிக்கெட் வீரர் பென் ஆஸ்டின், பேட்டிங் பயிற்சியின் போது ஏற்பட்ட துரதிர்ஷ்டவசமான விபத்தில் உயிரிழந்துள்ளார்.

மெல்போர்னில் உள்ள ஒரு கிளப் அணிக்காக விளையாடி வந்த பென் ஆஸ்டின், கடந்த செவ்வாய்க்கிழமை பெர்ன்ட்ரீ கல்லி மைதானத்தில் வலைப்பயிற்சி மேற்கொண்டார். அப்போது சக வீரர்கள் வீசிய பவுன்சர் பந்துகளை எதிர்கொண்டு ஹெல்மெட் அணிந்தபடி பேட்டிங் செய்தார். ஆனால், அவர் அணிந்திருந்த ஹெல்மெட்டில் கழுத்தைப் பாதுகாக்கும் பகுதி இல்லாததாக கூறப்படுகிறது.

இந்த நிலையில், எதிர்பாராத விதமாக ஒரு பந்து நேராக அவரது கழுத்துப் பகுதியில் பலமாக பட்டு விழுந்தது. அதனால் உடனே மயங்கி விழுந்த அவரை சக வீரர்கள் உடனடியாக அருகிலிருந்த மோனாஷ் மருத்துவமனைக்கு கொண்டு சென்றனர். அங்கே அவருக்கு இரு நாட்கள் தீவிர சிகிச்சை அளிக்கப்பட்டது. ஆனால் மருத்துவர்களின் முயற்சிகள் பலனின்றி, இன்று காலை அவர் மரணமடைந்தார்.

இச்சம்பவம் குறித்து ஆஸ்திரேலிய கிரிக்கெட் வாரியம் (Cricket Australia) ஆழ்ந்த துயரச்செய்தி ஒன்றை வெளியிட்டுள்ளது. “இளம் திறமையான வீரர் பென் ஆஸ்டின் துரதிர்ஷ்டவசமாக உயிரிழந்த செய்தி மிகுந்த வருத்தத்தை ஏற்படுத்துகிறது. அவரது குடும்பத்தினருக்கும் நண்பர்களுக்கும் எங்கள் ஆழ்ந்த இரங்கல்,” எனக் குறிப்பிடப்பட்டுள்ளது.

இந்த சம்பவம் 2014 ஆம் ஆண்டு பிலிப் ஹ்யூஸ் மரணம் நினைவூட்டும் வகையில், ஆஸ்திரேலிய கிரிக்கெட் உலகம் முழுவதும் துயரத்தை ஏற்படுத்தியுள்ளது. பல முன்னாள் வீரர்கள், பயிற்சியாளர்கள், ரசிகர்கள் என அனைவரும் சமூக வலைதளங்களில் இரங்கல் தெரிவித்து வருகின்றனர்.

இளம் வயதிலேயே கனவுகளுடன் கிரிக்கெட்டில் பிரகாசிக்க வந்த பென் ஆஸ்டின் இழப்பு, ஆஸ்திரேலிய கிரிக்கெட் வரலாற்றில் ஒரு துயரமான அத்தியாயமாக மாறியுள்ளது.