சிவகார்த்திகேயன் ‘பராசக்தி’: 50 நாள் முன் வெளியான ஸ்பெஷல் போஸ்டர்!

சுதா கொங்கரா இயக்கத்தில் சிவகார்த்திகேயன் நடிக்கும் 25-வது படமான ‘பராசக்தி’, ஆகாஷ் பாஸ்கரனின் Dawn Pictures நிறுவனம் தயாரிப்பில் உருவாகியுள்ளது. இப்படத்தில் அதர்வா, ரவி மோகன், பசில் ஜோசஃப் உள்ளிட்டோர் முக்கிய கதாபாத்திரங்களில் நடித்துள்ளார்கள். நாயகியாக ஸ்ரீலீலா இணைந்துள்ளார்.

ஜி.வி. பிரகாஷ் இசையமைப்பில், சுமார் ₹150 கோடி பட்ஜெட்டில் உருவாகியுள்ள இந்தப் படத்தின் படப்பிடிப்பு நிறைவடைந்து, தற்போது போஸ்ட் ப்ரொடக்ஷன் பணி நடைபெற்று வருகிறது. வரும் ஆண்டு பொங்கல் விடுமுறையையொட்டி, ஜனவரி 14-ம் தேதி ‘ஜனநாயகன்’ படத்துடன் ஒன்றாக திரைக்கு வர உள்ளது.

ஏற்கனவே வெளியான ப்ரோமோவும் முதல் பாடல் ‘அடி அலையே’யும் ரசிகர்களிடையே நல்ல வரவேற்பைப் பெற்றிருந்தன. இதையடுத்து, இரண்டாவது பாடல் “ரத்னமாலா” இன்று மாலை 5.30 மணிக்கு வெளியாகும் என படக்குழு அறிவித்திருந்தது.

இந்த நிலையில், படம் வெளியாவதற்கு இன்னும் 50 நாட்கள் மட்டுமே உள்ளதை குறிப்பதாக, புதிய போஸ்டரை படக்குழு வெளியிட்டுள்ளது. போஸ்டர் சமூக வலைதளங்களில் வேகமாக பரவி வைரலாகி வருகிறது.