புதிய தலைமுறை சேனல் முடக்கம்: “கருத்துச் சுதந்திரம் காப்பாற்றப்படுகிறதா, முதல்வரே?”

மக்களின் பார்வைக்கு சமூக, அரசியல் நிகழ்வுகளை விமர்சன கண்ணோட்டத்துடன் கொண்டு வரும் ஊடகங்கள் மீது அதிகார அமைப்புகளின் அழுத்தம் அல்லது தடை — இது புதியதல்ல, நீண்ட காலமாகத் தொடரும் நிகழ்ச்சிதான். தமிழ்நாட்டில் இதுபோன்ற சம்பவங்கள் நடைபெறாது என பெருமைப்பட நினைக்கும் தருணத்தில், அதற்கே முரணான கவலைக்குரிய தகவல் ஒன்று வெளிவந்துள்ளது.

மாநில அரசின் கட்டுப்பாட்டில் உள்ள தமிழ்நாடு கேபிள் டிவி (TAC TV) வலையமைப்பிலிருந்து முன்னணி ஊடக நிறுவனமான “புதிய தலைமுறை” தொலைக்காட்சி சேனல் திடீரென நீக்கப்பட்டிருக்கிறது. அரசு கேபிள் இணைப்பைப் பயன்படுத்தும் பார்வையாளர்கள் அக்டோபர் 4 முதல் அந்த சேனலை காண முடியாமல் தவிக்கின்றனர்.

இது குறித்து “புதிய தலைமுறை” குழுமம் இதுவரை எந்தவித அதிகாரப்பூர்வ அறிக்கையும் வெளியிடவில்லை. ஆனால் பல அரசியல் தலைவர்களும், பத்திரிகையாளர்களும், ஊடகத் துறையினர் இதை கடுமையாகக் கண்டித்துள்ளனர். தற்போது சில மாவட்டங்களில் சேவை மீண்டும் வழங்கப்பட்டாலும், பெரும்பாலான பகுதிகளில் சேனல் இன்னும் அணுக முடியாத நிலையில் உள்ளது. குழுமத்தினர் அரசு அதிகாரிகளிடம் தொடர்பு கொண்டு பிரச்சினையைத் தீர்க்க முயற்சி மேற்கொண்டிருப்பதாகத் தகவல் வெளியாகியுள்ளது.

திடீர் நீக்கம் — காரணம் அறிவிக்கப்படவில்லை
டிஏசிடிவி தரப்பில் இதற்கான காரணம் இதுவரை விளக்கப்படவில்லை. சேனல் நீக்கப்படும் முன் எந்தவித முன்னறிவிப்பும் வழங்கப்படவில்லை. குறிப்பிட்ட செய்தி ஒளிபரப்பே இதற்குக் காரணமாக இருந்தாலும், அதற்கான அதிகாரப்பூர்வ விளக்கமோ எச்சரிக்கையோ விடுக்கப்படவில்லை என்று ஊடகத்துறையினர் கூறுகின்றனர்.

கரூர் நிகழ்வைத் தொடர்ந்து தாக்கம்?
கரூரில் நடைபெற்ற மரணங்கள் தொடர்பான செய்திகளில், காவல்துறையையும், ஆட்சியையும் விமர்சிக்கும் வகையில் “புதிய தலைமுறை” செய்திகளை ஒளிபரப்பியது. இதுவே திமுக ஆட்சிக்கு விருப்பமில்லாததாக இருந்ததாகவும், அதனால்தான் அந்த சேனலை வலையமைப்பிலிருந்து நீக்கியதாகவும் ஊடக வட்டாரங்கள் கருதுகின்றன.
மேலும், தவெக தலைவர் விஜய் வழங்கிய உரைகளும், அவர் அரசை நேரடியாக விமர்சித்த நிகழ்ச்சிகளும் அதிக முக்கியத்துவத்துடன் ஒளிபரப்பப்பட்டதால், ஆளுங்கட்சியினரிடையே அதிருப்தி ஏற்பட்டதாகவும் கூறப்படுகிறது.

ஒரு மூத்த ஊடகத்துறை நபர் (பெயர் வெளியிட வேண்டாம் என்ற நிபந்தனையுடன்) கூறியதாவது:

“கரூர் சம்பவம் தொடர்பான செய்திகள் மட்டுமல்ல, விஜய் நிகழ்ச்சிகளும் அதற்குக் காரணம். அவர் பேசும் உரைகள், அரசை விமர்சிக்கும் விதம் ஆகியவை அதிகம் வெளிப்படுத்தப்பட்டன. ஊடக சுதந்திரத்தின் அடிப்படையில் இது சரியானதுதான். ஆனால் அதுவே ஆட்சியாளர்களுக்கு அசௌகரியமாக இருந்திருக்கிறது. அதனால்தான் இந்த நடவடிக்கை ஏற்பட்டிருக்கலாம்.”

ஊடகத்தின் உரிமை vs அரசின் கோபம்
இந்த நடவடிக்கையில் நியாயம் எதுவும் இல்லையென கூறலாம். ஆனால் ஆளுங்கட்சியினர் காட்டும் கோபத்தை முழுமையாக புரிந்துகொள்ள முடியாதுமில்லை. சிலர் சுட்டிக்காட்டுவது போல், “புதிய தலைமுறை” விஜய் வருகை, ரசிகர் வரவேற்பு, மேடை உரைகள் போன்றவற்றை மிகைப்படுத்தி ஒளிபரப்பியது. அதே சமயத்தில், பிற அரசியல் கட்சிகளின் நடவடிக்கைகளுக்கு அதே அளவு முக்கியத்துவம் வழங்கப்படவில்லை என்ற கருத்தும் எழுந்துள்ளது.

எதுவாயினும், ஊடக சுதந்திரத்தை கட்டுப்படுத்தும் எந்த முயற்சியும் மக்களாட்சி அடிப்படைக்கு எதிரானதாகவே இருக்கும். அரசை விமர்சிக்கும் குரல்கள் ஒலிக்க முடியாத சூழல் உருவாகுவது தான் இச்சம்பவத்தின் மிகப்பெரிய ஆபத்து.