தோல்வி காரணம் குறித்து கம்பீருக்கு கவாஸ்கர் முழு ஆதரவு

கொல்கத்தா ஈடன்கார்டனில் தென் ஆப்பிரிக்காவுக்கு எதிரான முதலாவது டெஸ்டில் இந்திய அணி 30 ரன்கள் வித்தியாசத்தில் மூன்றாம் நாளிலேயே தோல்வியடைந்தது. 124 ரன்கள் இலக்கை துரத்த முடியாமல், 35 ஓவர்களில் 93 ரன்னில் இந்திய அணி சரிந்தது.

இந்த ஆடுகளம் முதல் நாளிலேயே சுழலுக்கு ஆதரவு அளித்தது. இரண்டாம் நாளில் பந்து அதிகமாக திரும்பியதால் பேட்ஸ்மேன்கள் சிரமப்பட்டனர். இதுபோன்ற பிட்சை கேட்டதோ நாம்தான், மேலும் இது விளையாட முடியாத அளவுக்கு மோசமான பிட்சாக இல்லை; சரியான தடுப்பாட்டம் இருந்திருந்தால் வெற்றியடைய முடிந்திருக்கும் என தலைமை பயிற்சியாளர் கவுதம் கம்பீர் கூறினார்.

இதற்கு முன்னாள் வீரர்களும் ரசிகர்களும், கடந்த ஆண்டு நியூசிலாந்துக்கு எதிராக இதே மாதிரி பிட்சில் தோல்வியடைந்ததை நினைவுபடுத்தி கம்பீரை விமர்சித்து வருகின்றனர்.

ஆனால், கம்பீர் கருத்துக்கு முன்னாள் இந்திய வீரர் சுனில் கவாஸ்கர் ஆதரவு தெரிவித்துள்ளார். அவர் கூறியதாவது: “கம்பீர் சொல்வது சரியே. இந்த பிட்சில் 124 ரன்களை துரத்தலாம். பலர் பிட்சை குறை சொல்கிறார்கள், ஆனால் உண்மையில் அது 5வது நாள் பிட்ச் போல இருந்தது. சைமன் ஹார்மர் வீசிய ஓவரில் இரண்டு பந்துகள் மட்டுமே சுழன்றன. தாறுமாறான சுழல் இல்லை.

பிரச்சினை பேட்டிங் அணுகுமுறையில்தான். ஒருநாள் அல்லது டி20 ஆட்ட பாணியில் விளையாட முயன்றதே தவறு. இந்தியாவின் வலுவான பேட்டிங் வரிசைக்கு 124 ரன்களை 5 விக்கெட்டுகள் மீதம் வைத்து சேஸ் செய்ய முடியும். எனவே பிட்ச்சில் தவறு இல்லை; கம்பீர் கருத்தை நான் ஏற்கிறேன்,” என்று கவாஸ்கர் கூறினார்.