சொந்த மண்ணிலேயே இந்தியா அணி ஒயிட்வாஷ்

கவுகாத்தியில் நடைபெற்ற இந்தியா – தென் ஆப்பிரிக்கா இடையேயான 2-வது மற்றும் கடைசி டெஸ்ட் போட்டியில், தென் ஆப்பிரிக்கா தொடக்கம் முதலே ஆதிக்கம் செலுத்தி இந்தியாவை ஒயிட்வாஷ் செய்துள்ளது.

டாஸ் வென்று முதலில் பேட்டிங் செய்த தென் ஆப்பிரிக்கா, 489 ரன்கள் குவித்தது. செனுரன் முத்துசாமி சிறப்பான சதம் (109) அடித்து அணியை முன்னிலையில் நிறுத்தினார். பின்னர் பதிலடிக்க களமிறங்கிய இந்தியா முதல் இன்னிங்சில் 83.5 ஓவர்களில் 201 ரன்களுக்கு மட்டுமே ஆட்டமிழந்தது. இந்தியாவுக்காக ஜெயஸ்வால் 58 ரன்கள் எடுத்தார். மார்கோ ஜான்சன் 6 விக்கெட்டுகளை பிடித்து இந்தியாவை சிக்கவைத்தார்.

அதைத்தொடர்ந்து பாலோ-ஆன் வழங்காமல் 288 ரன்கள் முன்னிலையில் இருந்த தென் ஆப்பிரிக்கா, 2-வது இன்னிங்சில் 260/5 என்ற கணக்கில் டிக்ளேர் செய்தது. இதனால் இந்தியாவுக்கு 549 ரன்கள் என்ற கடின இலக்கு நிர்ணயிக்கப்பட்டது.

பெரும் இலக்கை துரத்த களமிறங்கிய இந்தியா, தென் ஆப்பிரிக்கா பந்துவீச்சை சமாளிக்க முடியாமல் தொடர்ச்சியாக விக்கெட்டுகளை இழந்தது. ஜடேஜா மட்டும் 54 ரன்கள் எடுத்து சிறிதளவு எதிர்ப்பு கொடுத்தார். இறுதியில் இந்தியா 140 ரன்களுக்கு ஆட்டமிழந்து, 408 ரன்கள் வித்தியாசத்தில் தோல்வி கண்டது.

கொல்கத்தா டெஸ்டிலும் வெற்றிபெற்ற தென் ஆப்பிரிக்கா, இந்த வெற்றியால் தொடரை 2-0 என கைப்பற்றி இந்தியாவை சொந்த மண்ணில் ஒயிட்வாஷ் செய்தது.

இதைத் தொடர்ந்து, இந்திய கேப்டன் ரிஷப் பண்ட் கூறியதாவது:

“இந்த தோல்வி ஏமாற்றமளிக்கிறது. ஒரு அணியாக நாங்கள் இன்னும் சிறப்பாக செயல்பட வேண்டியது அவசியம். தென் ஆப்பிரிக்கா சிறப்பாக விளையாடி தொடரை முழுமையாக கட்டுப்படுத்தியது. எங்கள் மனநிலை தெளிவாக இருக்கவில்லை. எதிர்காலத்தில் இந்த தவறுகளிலிருந்து கற்றுக்கொண்டு முன்னேறுவோம். கிரிக்கெட் ஒரு அணியாக செயல்படும் விளையாட்டு. அதை இந்த தொடரில் நாங்கள் சரியாக செய்யவில்லை. எங்கள் திட்டத்தில் கவனம் செலுத்துவதே இப்போது முக்கியம்” என தெரிவித்தார்.