கனடா ஓபன் ஸ்குவாஷ்: 17 வயது இந்திய வீராங்கனை சாம்பியனை வீழ்த்தினார்

டொராண்டோவில் நடைபெற்று வரும் கனடா மகளிர் ஓபன் ஸ்குவாஷ் தொடரில், இந்தியாவின் இளம் வீராங்கனை அனாஹெத், வெறும் 17 வயதிலேயே உலக ஸ்குவாஷ் உலகில் பெரும் அதிர்ச்சியை ஏற்படுத்தியுள்ளார். சிறந்த திறமையுடன் விளையாடி வரும் அனாஹெத், தொடரின் காலிறுதி போட்டியில் உலகின் முன்னணி வீராங்கனை, நடப்பு சாம்பியனான பெல்ஜியத்தின் டின்னே கில்லிஸ் உடன் மோதினார்.

ஆட்டம் தொடக்கம் முதலே தன்னம்பிக்கையுடன் களமிறங்கிய அனாஹெத், முதல் செட்டை கடுமையான போராட்டத்திற்குப் பிறகு 12-10 என்ற கணக்கில் கைப்பற்றினார். தொடர்ந்து அதே உற்சாகத்தில் விளையாடிய அவர், இரண்டாம் மற்றும் மூன்றாம் செட்களையும் 11-9, 11-9 என்ற கணக்கில் வென்று நேர் செட்களில் 3-0 என்ற கணக்கில் எதிரியை வீழ்த்தி அரையிறுதிக்குள் நுழைந்தார்.

இந்த வெற்றி அனாஹெத்தின் வாழ்க்கையில் முக்கியமான திருப்புமுனையாக அமைந்துள்ளது. உலக தரவரிசையில் தற்போது 43-வது இடத்தில் உள்ள இவர், 7-வது இடத்தில் உள்ள கில்லிஸை வீழ்த்தி பெரும் வரலாற்றை படைத்துள்ளார். இது அவரின் முதல் முன்னணி 10 வீராங்கனைக்கு எதிரான வெற்றியாகும், எனவே இது அவரது வாழ்க்கையின் மிகப்பெரிய சாதனையாக கருதப்படுகிறது.

மேலும் குறிப்பிடத்தக்கது என்னவெனில், காலிறுதிக்கு முன் நடைபெற்ற சுற்றில் அனாஹெத், உலகின் 20-வது இடத்தில் உள்ள பிரான்சின் மெலிசா ஆல்வ்ஸ் என்பவரையும் வீழ்த்தியிருந்தார். தொடர் முழுவதும் மிகுந்த தன்னம்பிக்கை, சுறுசுறுப்பு மற்றும் மன உறுதியுடன் விளையாடிய அனாஹெத்தின் இந்த வெற்றிகள், இந்திய ஸ்குவாஷ் விளையாட்டில் புதிய நம்பிக்கையை உருவாக்கியுள்ளது.

பல விளையாட்டு வல்லுநர்கள், “இளம் வயதிலேயே இப்படியான திறமை வெளிப்படுத்தும் அனாஹெத், எதிர்காலத்தில் இந்தியாவுக்குப் பெருமை சேர்ப்பார்” என்று பாராட்டி வருகின்றனர்.