100 மில்லியன் பார்வைகள் கடந்த ‘மோனிகா’ – அனிருத்தின் 45வது சாதனை

இசையமைப்பாளர் அனிருத் ரவிச்சந்தர் இசையில் வெளியான ‘மோனிகா’ வீடியோ பாடல், இணையத்தில் அபார வரவேற்பைப் பெற்று தற்போது 100 மில்லியன் பார்வைகளை கடந்துள்ளது. இந்த சாதனையின் மூலம், அனிருத் தனது இசைப் பயணத்தில் 45-வது முறையாக 100 மில்லியன் பார்வைகளைத் தாண்டிய பாடலை வழங்கியுள்ளார் என்பதும் குறிப்பிடத்தக்கது. பாடல் வெளியான முதல் நாளிலிருந்தே சமூக வலைதளங்களில் வேகமாக பரவத் தொடங்கி, ரீல்ஸ், ஷார்ட்ஸ் மற்றும் ரசிகர் எடிட்கள் மூலம் தொடர்ந்து வைரலானது.

குறிப்பாக இளம் ரசிகர்கள் மத்தியில் இந்த பாடல் பெரும் கிரேஸை பெற்றது. லிரிக் வீடியோ வெளியாகிய தருணத்திலேயே நல்ல வரவேற்பைப் பெற்ற நிலையில், அதன் பின்னர் வெளியான வீடியோ பாடல் பார்வை எண்ணிக்கையை இன்னும் வேகமாக உயர்த்தியது. துடிப்பான இசை, நவீன அமைப்பு மற்றும் அனிருத்தின் தனித்துவமான ஸ்டைல் ஆகியவை இந்தப் பாடலை மீண்டும் மீண்டும் கேட்க வைக்கும் வகையில் அமைந்துள்ளன. தொடர்ச்சியாக ஹிட் பாடல்களை வழங்கி வரும் அனிருத், இந்த சாதனையின் மூலம் தமிழ் சினிமாவில் மட்டுமல்ல, இந்திய அளவிலும் முன்னணி இசையமைப்பாளராக தன் ஆதிக்கத்தை உறுதிப்படுத்தியுள்ளார்.