மாதம்பட்டி ரங்கராஜால் பெண்கள் பலர் பாதிப்பு –ஜாய் கிரிஸில்டா அதிர்ச்சி தகவல்

சென்னை: நடிகர் மாதம்பட்டி ரங்கராஜ் மீது அவரது இரண்டாவது மனைவியான ஜாய் கிரிஸில்டா அளித்த புகாரைத் தொடர்ந்து, இந்த விவகாரம் புதிய பரபரப்பை ஏற்படுத்தியுள்ளது.

ஜாய் கிரிஸில்டா தற்போது கர்ப்பிணியாக உள்ளார். “தன்னை கர்ப்பமாக்கி பின்னர் ஏமாற்றிவிட்டார்” என்று கூறி, அவர் சென்னை காவல் ஆணையர் அலுவலகத்தில் ரங்கராஜ் மீது புகார் அளித்தார். இதையடுத்து, அந்த வழக்கு பெண்களுக்கு எதிரான குற்றங்களைத் தடுக்கும் பிரிவு அதிகாரிகளிடம் மாற்றப்பட்டது. அவர்கள் ஜாயிடம் ஆறு மணி நேரம் விசாரணை நடத்தினர். விரைவில் ரங்கராஜையும் விசாரிக்க உள்ளதாகத் தகவல் வெளியானது.

இதற்கிடையில், “ஜாய் கிரிஸில்டா தன்னைப் பற்றி சமூக வலைதளங்களில் அவதூறாக பேசுகிறார்; அதன் மூலம் தனது பெயரும், நிறுவனத்தின் மதிப்பும் பாதிக்கப்பட்டுள்ளன” என்று கூறி, ரங்கராஜ் நீதிமன்றத்தில் மனு தாக்கல் செய்தார். ஆனால் நீதிமன்றம், “கருத்து தெரிவிக்கும் உரிமையைத் தடுக்க முடியாது” எனக் கூறி, அந்த மனுவை நிராகரித்தது.

இந்த தீர்ப்பால் மகிழ்ச்சியடைந்த ஜாய் கிரிஸில்டா, “நீதியில் எனக்கு நம்பிக்கை இருக்கிறது” எனக் கூறி, இன்ஸ்டாகிராம் ஸ்டேட்டஸ்களில் பல பதிவுகளைப் பகிர்ந்தார். மேலும், “தனியாக இருந்தாலும் உண்மையின் பக்கம் நிற்பேன்” என்றும் குறிப்பிட்டார்.

பின்னர், சென்னையில் பத்திரிகையாளர்களைச் சந்தித்த ஜாய் கிரிஸில்டா, “மாதம்பட்டி ரங்கராஜ் தரப்பிலிருந்து இதுவரை எனக்கு மிரட்டல் வரவில்லை. ஆனால் எதிர்காலத்தில் எனக்கும், எனது குழந்தைக்கும் ஏதேனும் நடந்தால் அதற்குப் பொறுப்பு ரங்கராஜ் மேல் தான் இருக்கும்,” என்றார்.

அதோடு, “மாதம்பட்டி ரங்கராஜால் நான் மட்டுமல்ல, பல பெண்களும் பாதிக்கப்பட்டுள்ளனர். அவர்களே நேரடியாக வந்து எனக்குச் சொன்னார்கள்,” என்று அதிர்ச்சிகரமான குற்றச்சாட்டையும் முன்வைத்தார்.

ஜாய் கூறிய இந்த கருத்து சமூக வலைதளங்களில் பெரும் விவாதத்தை ஏற்படுத்தியுள்ளது. சிலர் அவருக்கு ஆதரவாக கருத்து தெரிவிக்க, சிலர் இது குடும்ப பிரச்சனையை வெளியில் கொண்டு வருவது தவறு என்றும் விமர்சனம் செய்துள்ளனர்.

இந்நிலையில், காவல் துறை விரைவில் மாதம்பட்டி ரங்கராஜை விசாரிக்க உள்ளதாகத் தகவல் வெளியாகியுள்ளது. விசாரணை முடிவுகள் மற்றும் மேலதிக நடவடிக்கைகள் தற்போது அனைவரின் கவனத்தையும் ஈர்த்துள்ளன.