காமெடி நடிகர் போண்டா மணி மரணம்! சோகத்தில் திரையுலகம்!

தமிழ் திரை உலகின் பிரபல காமெடி நடிகர் போண்டாமணி காலமானார். அவரது மறைவிற்கு திரையுலக பிரபலங்கள் இரங்கல் தெரிவித்து வருகின்றனர். நகைச்சுவை நடிகர் போண்டாமணிக்கு இரு சிறுநீரகமும் செயல் இழந்ததால் அவர் கடந்த சில நாட்களாக சிகிச்சை பெற்று வந்ததாக தெரிகிறது.

இந்த நிலையில் நடிகர் போண்டாமணி இன்று தனது வீட்டில் திடீரென மயங்கி விழுந்ததாகவும் குரோம்பேட்டை அரசு மருத்துவமனையில் அனுமதிக்கப்பட்ட அவரை மருத்துவர்கள் பரிசோதனை செய்தபோது ஏற்கனவே அவர் இறந்து விட்டதாகவும் தெரிவித்தனர். நடிகர் போண்டாமணியின் மறைவை அடுத்து திரை உலக பிரபலங்கள் தங்கள் சமூக வலைதளங்களில் இரங்கல் தெரிவித்து வருகின்றனர்.

மறைந்த போண்டாமணிக்கு வயது 60. பாக்யராஜ் இயக்கத்தில் உருவான ’பவுனு பவுனுதான்’ என்ற படத்தில் தொடங்கி அவர் ஏராளமான படங்களில் நகைச்சுவை கேரக்டரில் நடித்திருக்கிறார் என்பதும் குறிப்பாக வடிவேலு குரூப்புடன் இணைந்து பல திரைப்படங்களில் நடித்துள்ளார்.

அவர் வடிவேலுவுடன் இணைந்து ’அடிச்சு கேட்டா கூட சொல்லிடாதீங்க’ என்ற காமெடி இன்றும் விழுந்து விழுந்து சிரிக்கும் வகையில் இருக்கும் என்பது குறிப்பிடத்தக்கது. இலங்கையில் இருந்து தமிழகத்திற்கு வந்த போண்டாமணி முன்னாள் முதல்வர் ஜெயலலிதா முன்னிலையில் அதிமுகவில் இணைந்திருந்தார் என்பதும் அக்கட்சிக்காக தேர்தல் பிரச்சாரமும் செய்து இருந்தார் என்பதும் குறிப்பிடத்தக்கது.