“விஜய்க்கு யாரும் அட்வைஸ் பண்ண வேண்டியதில்லை… செந்தில் பாலாஜி வந்தது எப்படி?” — கமல்ஹாசன் கடும் பதில்

கரூர்: நடிகரும் மக்கள் நீதி மய்யம் தலைவருமான கமல்ஹாசன், “விஜய்க்கு நான் அறிவுரை சொல்ல வேண்டிய அவசியம் இல்லை; அவர் இப்போது ஒரு தலைவராக தனது கடமையைச் செய்ய வேண்டிய நேரம் இது,” என தெரிவித்துள்ளார். மேலும், “செந்தில் பாலாஜி உடனடியாக வந்தார் என்ற குற்றச்சாட்டு தவறு; இது அவரின் சொந்த ஊர் என்பதால் அவர் வந்தது இயல்பானது,” என்றும் விளக்கம் அளித்தார்.

கரூரில் விஜய் தலைமையிலான தவெகக் கூட்டத்தில் ஏற்பட்ட கூட்ட நெரிசல் காரணமாக 41 பேர் உயிரிழந்ததோடு, 100-க்கும் மேற்பட்டோர் காயமடைந்துள்ளனர். இந்த துயரச் சம்பவம் தவெகக் கட்சிக்கும், தமிழ்நாடு அரசியலுக்கும் பெரிய அதிர்ச்சியை ஏற்படுத்தியுள்ளது.

இதையடுத்து அரசியல் கட்சித் தலைவர்கள் பலரும் கரூருக்கு சென்று பாதிக்கப்பட்ட குடும்பங்களுக்கு ஆறுதல் தெரிவித்து வருகின்றனர். அதன்படி கமல்ஹாசனும் இன்று கரூர் வேலுச்சாமிபுரம் பகுதியில் சென்று உயிரிழந்த மகேஸ்வரியின் இல்லத்தில் குடும்பத்தினருக்கு ஆறுதல் கூறினார். மேலும், கமல் பண்பாட்டு மையம் சார்பில் ரூ.1 லட்சம் நிவாரண நிதிக்காசோலையை வழங்கினார்.

பின்னர் செய்தியாளர்களிடம் பேசிய கமல்ஹாசன் கூறியதாவது:

“இப்போது யாரையும் பாராட்டவோ, குற்றம் சொல்லவோ வேண்டிய நேரம் இல்லை. சில ஊடகங்கள் பல உண்மைகளை வெளிக்கொணர்ந்துள்ளன. செந்தில் பாலாஜி உடனே வந்தார் என்பதைக் குற்றமாகச் சொல்வது தவறு — இது அவருடைய சொந்த ஊர் என்பதால் அவர் வந்தது இயல்பானது.

உயிரிழந்தவர்களை எண்களாகக் கணக்கிடக் கூடாது; அவர்களுக்கு குடும்பம், உறவினர்கள் உள்ளனர். அரசு மற்றும் முதல்வர் இந்தச் சூழ்நிலையில் விரைவாகச் செயல்பட்டுள்ளனர். இனி இதுபோன்ற கூட்டங்கள் மக்கள் நெரிசலைத் தவிர்க்கக் கூடிய வெளிப்புற இடங்களில் நடத்தப்பட வேண்டும்.

தவெக கூட்டம் லைட் ஹவுஸ் கார்னரில் நடந்திருந்தால் ஆற்றில் விழுந்து உயிரிழப்பு இன்னும் பெரிதாகி இருக்கும். நான் சொல்வது அரசியல் அல்ல, மனிதம் பற்றியது. எடப்பாடி பழனிசாமி உள்ளிட்டோர் பேசுவது அரசியல் — இப்போதுதான் அதைச் செய்ய வேண்டிய நேரம் அல்ல. அடுத்த மாதங்களில் அதைப் பற்றி விவாதிக்கலாம்.

எதிர்காலத்தில் இப்படியான விபத்துகள் மீண்டும் ஏற்படாதவாறு அனைத்து கட்சிகளும் ஒன்று கூடி சட்ட ரீதியான முடிவுகளை எடுக்க வேண்டும். உயிரிழந்த குடும்பங்களுக்கு எவ்வளவு நிதி கொடுத்தாலும், அது இழந்த உயிருக்கு ஈடாகாது. போட்டி போட்டு நிவாரணம் அளிப்பதை விட நீதியே அவர்களுக்கு தேவை.

இது யாரையும் குற்றம் சொல்லும் நேரம் அல்ல. இதில் நான் உட்பட அனைவருக்கும் பொறுப்பு இருக்கிறது. விஜய்க்கு நான் அறிவுரை சொல்ல விரும்பவில்லை; அவர் செய்ய வேண்டியது தலைவராகச் செய்வார் என்ற நம்பிக்கை எனக்குள்ளது.

நான் எவ்வளவு நிதி கொடுத்தேன் என்று வெளிப்படுத்துவது அழகல்ல. தவெகவைக் குறை சொல்ல வேண்டிய நேரம் இது அல்ல. சட்டம் தனது பாதையில் செயல்படுகிறது; SIT குழு அமைக்கப்பட்டுள்ளது. அவர்கள் விசாரணை நேர்மையாகவும் ஆழமாகவும் நடைபெறும் என்பதில் எனக்கு நம்பிக்கை உள்ளது.”

இவ்வாறு கமல்ஹாசன் கூறியுள்ளார்.