ஜன நாயகன்: ஃபர்ஸ்ட் சிங்கிள் மட்டும் அல்ல, ஆடியோ வெளியீடும் ரத்தானதா?

சென்னை: விஜய்க்கு சுமார் ரூ.250 கோடி சம்பளம் கொடுத்து ‘ஜனநாயகன்’ படத்தை தயாரித்து வரும் கேவிஎன் நிறுவனம், படம் திட்டமிட்டபடி எந்த பிரச்சனையும் இல்லாமல் வெளியாகுமா என்ற அச்சத்தில் இருப்பதாக சினிமா வட்டாரத்தில் தகவல்கள் வெளியாகியுள்ளன.

ஆயுத பூஜை விடுமுறையை முன்னிட்டு அக்டோபர் 5ஆம் தேதி விஜய் குரலில் ‘ஜனநாயகன்’ படத்தின் ஃபர்ஸ்ட் சிங்கிள் வெளியாகும் என ரசிகர்கள் பெரும் எதிர்பார்ப்புடன் இருந்தனர். ஆனால், அதை வெளியிட வேண்டாம் என விஜய் உத்தரவிட்டதாக கூறப்படுகிறது. இதனால் தீபாவளிக்குள் கூட பாடல் வெளியாகுமா என்ற சந்தேகம் எழுந்துள்ளது. மேலும், ஆடியோ வெளியீட்டு விழாவும் நடத்தப்படாது என்கின்றனர்.

அடுத்த ஆண்டு 2026 பொங்கலுக்கு ஜனவரி 9ஆம் தேதி படத்தை வெளியிட நடிகர் விஜய் திட்டமிட்டுள்ளார். இந்த ஆண்டே படம் வெளிவந்திருக்க வாய்ப்பு இருந்தாலும், விஜய்யின் மாஸ்டர் பிளான் காரணமாக வெளியீடு தள்ளிப்போயுள்ளது. இதனால், தற்போது படம் தியேட்டர்களில் நேரத்திற்கு வெளியானால் போதும் என்ற நிலைப்பாட்டில் தயாரிப்பு நிறுவனம் உள்ளது.

கரூர் விபத்துக்குப் பிறகு, விஜய் எந்தவொரு கொண்டாட்ட நிகழ்ச்சிகளிலும் பங்கேற்காமல், பாதிக்கப்பட்ட மக்களை நேரடியாகச் சந்தித்து ஆறுதல் அளிக்கவே விரும்புவதாக கூறப்படுகிறது. அதனால் பொங்கல் வரை எந்த ப்ரீ-ரிலீஸ், ஆடியோ லாஞ்ச் போன்ற கொண்டாட்ட நிகழ்வுகளிலும் அவர் பங்கேற்கமாட்டார் என தகவல்கள் கசிந்துள்ளன.

இந்த நிலைமையால், ரசிகர்களிடையே கலவையான உணர்வுகள் உருவாகியுள்ளன. ஒருபுறம் படத்தின் வெளியீடு தாமதமாகி வருவதால் ஏமாற்றம் நிலவினாலும், மறுபுறம் விஜய் எடுத்துள்ள மனிதநேய முடிவுக்கு பாராட்டு குவிந்து வருகிறது. சினிமா வட்டாரத்தில் “ஜனநாயகன்” படம் 2026 பொங்கல் பண்டிகையை குறிவைத்து வெளியாகினால், அது மட்டும் அல்லாமல் அடுத்த அரசியல் அத்தியாயத்துக்கும் தொடக்கம் ஆகும் என்கிறார்கள்.