பெயர் மாற்றம் ரவி மோகனுக்கு பெரும் பிரச்சனையா?

Ravi Mohan: டிக்கிலோனா படத்தை இயக்கிய கார்த்திக் யோகி இயக்கத்தில், நடிகர் ரவி மோகன் நடித்து வரும் ‘BRO CODE’ எனும் புதிய திரைப்படம் சமீபத்தில் பெரும் சட்ட சிக்கலில் சிக்கியுள்ளது. காரணம் – திரைப்படத்தின் தலைப்பு!

‘டிக்கிலோனா’ என்ற நகைச்சுவை டைம்-டிராவல் திரைப்படத்தின் மூலம் தனக்கென ஒரு ரசிகர் வட்டத்தை உருவாக்கிய இயக்குநர் கார்த்திக் யோகி, தற்போது ரவி மோகன் ஸ்டூடியோஸ் நிறுவனத்தின் தயாரிப்பில் உருவாகும் ‘BRO CODE’ படத்தை இயக்கி வருகிறார்.

இந்தப் படத்தில் நடிகர் எஸ்.ஜே. சூர்யா, ஷரத்தா ஸ்ரீநாத், மாளவிகா மனோஜ், ஸ்ரீ கௌரி பிரியா உள்ளிட்ட பலரும் முக்கிய கதாபாத்திரங்களில் நடிக்கின்றனர். படத்தின் படப்பிடிப்பு இறுதிக் கட்டத்தை எட்டியுள்ள நிலையில், எதிர்பாராத விதமாக புதிய பிரச்சனை ஒன்று தலைதூக்கியுள்ளது.

‘BRO CODE’ என்ற பெயரில் ஏற்கனவே மதுபான வகைகளை தயாரித்து வரும் இண்டோ ஸ்பிரிட் பிவரேஜஸ் நிறுவனம், அந்த பெயரின் பதிப்புரிமை (Trademark) தங்களுக்கே சொந்தமானது என்று வாதிட்டு, ரவி மோகன் ஸ்டூடியோஸிற்கு சட்ட நோட்டீஸ் அனுப்பியுள்ளது.

அந்நிறுவனம், “எங்கள் வணிகப்பெயரை திரைப்படத் தலைப்பாக பயன்படுத்துவது நுகர்வோரிடையே குழப்பம் ஏற்படுத்தும். இது வர்த்தக முத்திரை விதிமீறல் (Trademark Infringement) ஆகும்” எனக் கூறி, டெல்லி உயர் நீதிமன்றத்தில் வழக்கு தொடர்ந்தது.

இந்த வழக்கு டெல்லி உயர் நீதிமன்றத்தில் விசாரணைக்கு வர, ஆரம்பத்திலேயே நீதிமன்றம் ரவி மோகன் ஸ்டூடியோஸுக்கு எதிராக இடைக்காலத் தடை உத்தரவு (Interim Injunction) பிறப்பித்துள்ளது. அதன்படி, ‘BRO CODE’ என்ற பெயரைப் பயன்படுத்தி திரைப்படத்தை விளம்பரம் செய்யவோ, வெளியிடவோ தற்காலிகமாக தடை விதிக்கப்பட்டுள்ளது.

மேலும், ரவி மோகன் ஸ்டூடியோஸ் நிறுவனம் தங்களது பதிலை நான்கு வாரங்களுக்குள் சமர்ப்பிக்க வேண்டும் என நீதிமன்றம் அறிவித்துள்ளது. அடுத்த விசாரணை டிசம்பர் 23, 2025 அன்று நடைபெறவுள்ளது.

இந்நிலையில், நடிகர் ரவி மோகன் தற்போது ‘பராசக்தி’ மற்றும் ‘கராத்தே பாபு’ போன்ற படங்களில் நடித்து வருகிறார். இதோடு, அவர் தொடங்கியுள்ள ரவி மோகன் ஸ்டூடியோஸ் தயாரிப்பு நிறுவனம் மூலமாக பல்வேறு புதிய முயற்சிகளையும் மேற்கொண்டு வருகிறார். அவர் தயாரிப்பிலும் இயக்கத்திலும் சில திரைப்படங்கள் தற்போது உருவாகிக் கொண்டிருக்கின்றன.

இது முதல் முறை அல்ல. சமீபத்தில் இயக்குநர் விக்னேஷ் சிவன் தயாரித்த, பிரதீப் ரங்கநாதன் – எஸ்.ஜே. சூர்யா நடிப்பில் உருவாகிய ‘Life Insurance Company’ திரைப்படத்துக்கும் இதேபோன்ற பிரச்சனை ஏற்பட்டது.

அந்தப் பெயருக்கு எதிராக LIC நிறுவனம் வழக்கு தொடர, அதன் பின்னர் தலைப்பு ‘LIK’ என மாற்றப்பட்டது. அதேபோல், ‘BRO CODE’ படத்தின் தலைப்பும் சட்ட சிக்கல்களைத் தவிர்க்க சற்று மாற்றப்பட்ட வடிவில் வெளிவரும் வாய்ப்பு அதிகம் என திரையுலக வட்டாரங்கள் தெரிவிக்கின்றன.