25 நாட்களில் ஐந்தாவது எலிமினேஷன்- ரசிகர்கள் வருத்தம்

Bigg Boss 9 Tamil: கடந்த மாதம் துவங்கிய பிக் பாஸ் தமிழ் சீசன் 9, தற்போது 25 நாட்களை கடந்துவிட்டது. ஆரம்பத்திலிருந்தே பல திருப்பங்களும் உணர்ச்சி வெடிப்புகளும் நடந்து வரும் நிலையில், ஒவ்வொரு வாரமும் யார் வெளியேறப் போகிறார்கள் என்ற ஆவல் ரசிகர்களிடையே உச்சத்தை எட்டியுள்ளது.

முதல் வாரமே, போட்டியாளரான ரம்யா தன்னிச்சையாக வீட்டை விட்டு வெளியேறி அனைவரையும் அதிர்ச்சியடையச் செய்தார். அதே வாரம் பிரவீன் காந்தி குறைந்த வாக்குகள் பெற்றதால் வெளியேற்றப்பட்டார். தொடர்ந்து, இரண்டாவது மற்றும் மூன்றாவது வாரங்களில் அப்சரா மற்றும் ஆதிரை ஆகியோரும் பிக் பாஸ் வீட்டை விட்டு வெளியேறினர்.

இதுவரை மொத்தம் நான்கு போட்டியாளர்கள் வெளியேறிய நிலையில், தற்போது வெளியான தகவலின்படி, இந்த வாரம் குறைந்த வாக்குகள் பெற்ற போட்டியாளர் கலையரசன் வீட்டை விட்டு வெளியேறியுள்ளார். அவரின் ரசிகர்கள் இதை நம்ப முடியாமல் சமூக வலைதளங்களில் அதிர்ச்சி மற்றும் வருத்தத்தை வெளிப்படுத்தி வருகின்றனர்.

கலையரசன் கடந்த சில வாரங்களில் தனது நேர்மையான பேச்சு மற்றும் விளையாட்டு பாணியால் ரசிகர்களிடம் நல்ல வரவேற்பைப் பெற்றிருந்தார். ஆனால் சில வேளைகளில் ஏற்பட்ட கருத்து முரண்பாடுகள் மற்றும் நாமினேஷன் காரணமாக, இந்த வாரம் அவர் வெளியேற வேண்டிய சூழ்நிலை ஏற்பட்டுள்ளது.

இந்நிலையில், பிக் பாஸ் வீட்டில் அடுத்த வாரம் வைல்ட்கார்டு என்ட்ரி இருக்கலாம் என்ற தகவல் வெளிவந்துள்ளது. அதிலும் ஒரே நேரத்தில் நான்கு புதிய போட்டியாளர்கள் பிக் பாஸ் வீட்டிற்குள் வருவதாக கூறப்படுகிறது. இதனால், விளையாட்டின் போக்கு முழுமையாக மாறும் என ரசிகர்கள் எதிர்பார்க்கின்றனர்.

ரசிகர்கள் கருத்து தெரிவிக்கையில்,

“கலையரசன் வெளியேறுவது உண்மையிலேயே வருத்தமான விஷயம். ஆனால் வைல்ட்கார்டு எண்ட்ரியில் அவர் மீண்டும் வருவாரா?”
என்ற எதிர்பார்ப்பு சமூக வலைதளங்களில் தீவிரமாக பேசப்படுகிறது.

பிக் பாஸ் சீசன் 9 இப்போது புதுமுகங்களின் வரவால் மேலும் சுவாரஸ்யமாக மாறும் போலிருக்கிறது. வரவிருக்கும் எபிசோட்களில் என்ன நடக்கிறது என்பதை ரசிகர்கள் ஆவலுடன் காத்திருக்கின்றனர்!