“விஜய் ஆண்டனியின் பூக்கி First Single Out! 2K காதலர்களின் பிரேக்கப் ஆன்தம் வைரல்!”

‘பூக்கி’ படத்தின் முதல் சிங்கிள் ‘மனசு வலிக்குது… கிறுக்கு பிடிக்குது…’ தற்போது அதிகாரப்பூர்வமாக வெளியானது. தமிழ் திரையுலகில் இசையமைப்பாளராக தன்னை நிலைநிறுத்திக் கொண்ட விஜய் ஆண்டனிக்கு, நடிகராக மிகப்பெரிய வெற்றியைக் கொடுத்த படம் ‘பிச்சைக்காரன்’. இயக்குநர் சசி இயக்கிய அந்த படம் ரசிகர்கள் மத்தியில் பெரும் வரவேற்பைப் பெற்றதோடு, வசூலிலும் சாதனை படைத்தது.

அதனைத் தொடர்ந்து இசையமைப்பாளர், பாடகர், நடிகர், தயாரிப்பாளர், இயக்குநர் என பல துறைகளில் தன்னை வளர்த்துக் கொண்ட விஜய் ஆண்டனி, தற்போது ‘பூக்கி’ என்ற புதிய படத்தை தயாரித்து வருகிறார். இதில் விஜய் ஆண்டனியின் அக்கா மகனான, சில படங்களில் உதவி இயக்குநராக பணியாற்றிய அஜய் தீஷன் கதாநாயகனாக அறிமுகமாகிறார்.

‘சலீம்’ படத்தின் ஒளிப்பதிவாளர் கணேஷ் சந்திரா இப்படத்தை இயக்குகிறார். நடிகை தனுஷா நாயகியாக நடித்திருப்பதுடன், பாண்டியராஜன், சுனில், இந்துமதி மணிகண்டன், விவேக் பிரசன்னா, பிளாக் பாண்டி, ஆதித்யா கதிர், பிரியங்கா உள்ளிட்ட பலர் முக்கிய வேடங்களில் நடித்துள்ளனர்.

தமிழ் மற்றும் தெலுங்கு என இரண்டு மொழிகளில் உருவாகும் ‘பூக்கி’ அடுத்த ஆண்டு பிப்ரவரி 26 ஆம் தேதி திரையரங்குகளில் வெளியாகிறது. புதிய தலைமுறை (2K) காதலர்களின் ரிலேஷன்ஷிப் பிரச்சனைகளை அடிப்படையாகக் கொண்டு, நகைச்சுவையுடனும், த்ரில்லுடனும் இந்த படம் உருவாக்கப்பட்டுள்ளது.

இந்நிலையில், இப்படத்தின் முதல் பாடலான ‘மனசு வலிக்குது’ வெளியிடப்பட்டுள்ளது. காதலில் ஏற்படும் பிரிவின் வேதனையை மையமாகக் கொண்ட இந்த பாடலை விஜய் ஆண்டனியும் கரேஸ்மா ரவிச்சந்திரனும் இணைந்து இசையமைத்து பாடியுள்ளனர்.