மிகப் பெரிய ஓடிடி ரிலீஸ், லோகா Chapter 1 சந்திரா

Lokha Chapter 1: 2025ம் ஆண்டு இந்திய சினிமாவுக்கு வெற்றிகரமான ஆண்டாக அமைந்துள்ளது. பல்வேறு மொழிகளில், வித்தியாசமான கதைக்களங்களுடன் உருவான படங்கள் ரசிகர்களிடையே பெரும் வரவேற்பைப் பெற்று, பாக்ஸ் ஆபிஸில் சாதனை படைத்து வருகின்றன. அந்தப் பட்டியலில் தரமான கதை சொல்லலுக்காக பேசப்படும் படங்களில் ஒன்றாக திகழ்கிறது “லோகா சாப்டர் 1: சந்திரா”.

கடந்த ஆகஸ்ட் 28ம் தேதி திரையரங்குகளில் வெளியாகி ரசிகர்களின் இதயத்தை கொள்ளை கொண்ட இப்படம், வெறும் சில நாட்களில் மலையாள சினிமா வரலாற்றையே மாற்றி எழுதியது.

இந்தப்படத்தை தயாரித்தவர் பிரபல நடிகர் துல்கர் சல்மான், தயாரிப்பாளராகவும் திறமையை நிரூபித்தவர். இப்படத்தின் நாயகியாக கல்யாணி பிரியதர்ஷன் நடித்துள்ளார். அவர் “சந்திரா” எனும் மர்மமான பெண் கதாபாத்திரத்தில், இதுவரை பார்த்திராத அளவிற்கு ஆழமான நடிப்பை வெளிப்படுத்தியுள்ளார்.

அமைதியைத் தேடி கர்நாடகாவிற்கு வரும் சந்திரா, அங்கே உறுப்பு கடத்தல் மற்றும் தீய சக்திகளின் நிழல் உலகத்தில் சிக்கிக் கொள்கிறார். பின்னர் தனது அமானுஷ்ய சக்திகளை உணர்ந்து, அவற்றை பயன்படுத்தி இருண்ட சக்திகளுடன் போராடுகிறார். அந்த உளவியல் மற்றும் அதிரடி கலந்த கதை ரசிகர்களை திரையரங்குகளில் நாற்காலியின் முன் வைக்கும் அளவிற்கு ஈர்த்தது.

ரூ. 30 கோடி பட்ஜெட்டில் தயாரான இந்த படம், வெளியான ஏழு நாட்களுக்குள் உலகளவில் ரூ. 100 கோடி கிளப்பில் இணைந்தது. அதுமட்டுமல்லாமல், பாக்ஸ் ஆபிஸில் மொத்தமாக ரூ. 301.45 கோடிக்கு மேல் வசூல் செய்து சாதனை படைத்தது. இதன் மூலம் “லோகா சாப்டர் 1” மலையாள சினிமா வரலாற்றில் ₹300 கோடி வசூலைத் தாண்டிய முதல் படம் என்ற பெருமையை பெற்றுள்ளது.

இந்த சாதனையின் மூலம், நாயகியை மையமாகக் கொண்டு உருவான படங்களில் அதிக வசூல் செய்த படமாகவும் இதுவே முதலிடத்தில் திகழ்கிறது. இது பெண்கள் மையப்படுத்தப்பட்ட கதைகளும் வணிக ரீதியாக வெற்றியடைய முடியும் என்பதற்கான சிறந்த எடுத்துக்காட்டு.

திரையரங்குகளில் மிகப்பெரிய வெற்றியைப் பெற்ற இப்படம் தற்போது ஓடிடி ரசிகர்களின் கவனத்தை ஈர்த்துள்ளது. பலரும் “லோகா சாப்டர் 1” எப்போது ஸ்ட்ரீமிங் தளத்தில் வெளிவரும் என ஆவலுடன் காத்திருந்தனர்.

இப்போது, ரசிகர்களுக்காக ஒரு மகிழ்ச்சியான செய்தி! நம்பத்தகுந்த தகவலின்படி, “லோகா சாப்டர் 1: சந்திரா” வரும் அக்டோபர் 31ம் தேதி ஜியோ ஹாட் ஸ்டாரில் (Jio Hotstar) வெளியாக இருப்பதாக அறிவிப்பு வந்துள்ளது. இதன் மூலம், திரையரங்கில் படம் பார்க்க முடியாதவர்கள் அனைவரும், வீட்டிலிருந்தபடியே இந்த அதிரடி, அமானுஷ்ய அனுபவத்தை ரசிக்க முடியும்.