“அனிரூத் தான் போட்டியா?” – சாய் அபயங்கர் கூறிய சுவாரஸ்யமான பதில்!

மலையாள இயக்குநர் உன்னி சிவலிங்கம் இயக்கத்தில் வெளியாக உள்ள ஸ்போர்ட்ஸ் டிராமா திரைப்படம் ‘பல்டி’ கவனம் பெற்றிருக்கிறது.

இது, வளர்ந்து வரும் நட்சத்திரமான ஷேன் நிகாம் அவர்களின் 25வது படமாகும். தமிழ், மலையாளம் ஆகிய இரு மொழிகளில் உருவாகும் இப்படத்தில், சாந்தனு முக்கிய கதாபாத்திரத்தில் நடித்துள்ளார்.

தமிழ் சினிமாவின் இளம் சென்சேஷனாக வலம் வரும் சாய் அபயங்கர் இப்படத்திற்கு இசையமைத்துள்ளார். தற்போது அவர், ராம்குமார் பாலகிருஷ்ணன் இயக்கும் சிம்புவின் திரைப்படத்திலும், சூர்யாவின் ‘கருப்பு’ திரைப்படத்திலும் பணியாற்றி வருகிறார். இதைத் தொடர்ந்து, அல்லு அர்ஜுன் – அட்லி இணையின் பிரமாண்ட படத்திலும், லோகேஷ் கனகராஜ் யூனிவர்ஸ்-இல் உருவாகும் பென்ஸ் திரைப்படத்திலும் இசையமைத்து வருகிறார்.

‘பல்டி’ திரைப்படம் வருகிற செப்டம்பர் 26 ஆம் தேதி திரையரங்குகளில் வெளியாக உள்ளது.

இந்நிலையில், நேற்று (செப்.18) சென்னையில் நடைபெற்ற இப்படத்தின் பத்திரிகையாளர் சந்திப்பில் கலந்து கொண்ட சாய் அபயங்கரிடம், “அனிருத் மற்றும் உங்களுக்குள் போட்டி இருக்கிறது” என்ற கேள்வி எழுப்பப்பட்டது.

அதற்கு பதிலளித்த அவர்,
“அனிருத் ஏற்கனவே மிகுந்த சாதனைகளைப் படைத்துவிட்டார். நான் இப்போதுதான் தொடங்குகிறேன். எங்களுக்குள் எந்தவிதமான போட்டியும் இல்லை. அனைவரது ஆசீர்வாதத்துடனும் இன்னும் பல சாதனைகள் செய்ய விரும்புகிறேன்.” என்றார்.

மேலும் அவர்,
“இப்போது இருக்கும் இயக்குநர்கள் அனைவரும் புதுமையை விரும்புகின்றனர். நான் புதிதாக எதையாவது முயற்சி செய்தால், அதை அவர்கள் மகிழ்ச்சியுடன் ஏற்றுக்கொள்கிறார்கள். ஆல்பம் மற்றும் திரைப்பட இசை — இரண்டும் ஒரே மாதிரி அனுபவமாக இருக்கிறது.” என்றும் கூறினார்.