2026 தேர்தலுக்குத் தயாராகும் அதிமுக — கூட்டணிக்காக கையேந்தியும், மூன்றாம் இடமே நிச்சயம்! ஓபிஎஸ் அதிரடி விமர்சனம்

முன்னாள் முதலமைச்சர் ஓ. பன்னீர்செல்வம் வெளியிட்டுள்ள அறிக்கையில், “அதிமுக இன்று கூட்டணிக்காக கையேந்தும் நிலைக்கு தள்ளப்பட்டுள்ளது. முன்பு கூட்டணிக் கட்சிகள் அதிமுகவையே நோக்கி வந்தன; ஆனால் தற்போது நிலைமை மாறிவிட்டது. இந்த நிலையிலிருந்து மீள்வதில் தவறினால், வரவிருக்கும் 2026 சட்டமன்றத் தேர்தலில் அதிமுக வெற்றியைப் பெறுவது கடினம், மேலும் மூன்றாம் இடத்திற்கே தள்ளப்படும் அபாயம் உள்ளது,” என்று அவர் எச்சரித்துள்ளார்.

அவர் மேலும் கூறியதாவது — “புரட்சித் தலைவர் எம்.ஜி.ஆர். மற்றும் புரட்சித் தலைவி ஜெயலலிதா ஆகியோரின் தியாகம், ஆட்சி திறமை மற்றும் மக்களுக்கான சேவை உணர்வின் அடிப்படையில்தான் அதிமுக எழுச்சியடைந்தது. சத்துணவுத் திட்டம், அம்மா உணவகம், பெண்களுக்கு இலவச நலத்திட்டங்கள் என ஏராளமான மக்கள் நலத் திட்டங்கள் அதிமுக ஆட்சிக்காலங்களில் நிறைவேற்றப்பட்டன. இதுவே மக்கள் மனதில் அதிமுகவுக்கு இடம் கிடைத்ததற்கான காரணம்,” என்று அவர் குறிப்பிட்டார்.

அதேபோல், ஜெயலலிதா மறைவிற்கு பிறகு கழகம் எதிர்கொண்ட தொடர்ச்சியான தோல்விகளை நினைவூட்டிய ஓபிஎஸ், “கிட்டத்தட்ட ஒன்பது ஆண்டுகளாக அதிமுக எந்தத் தேர்தலிலும் வெற்றியை காணவில்லை. நாடாளுமன்றம், சட்டமன்றம், உள்ளாட்சி என்று ஒவ்வொரு நிலையும் தோல்வி மாறாத நிலையில் உள்ளது. புரட்சித் தலைவர் எம்.ஜி.ஆர். காலத்திலும், அம்மா காலத்திலும் இடைப்பட்ட தோல்விகள் இருந்தபோதிலும், அதனை வெற்றியால் திருப்பியெடுத்தோம். ஆனால் தற்போது அந்த உற்சாகமும் ஒற்றுமையும் இல்லாததால், கழகம் சரிவை நோக்கி செல்கிறது,” என்று கூறினார்.

இறுதியாக, ஓபிஎஸ் வலியுறுத்தியதாவது — “அதிமுக தற்போது ‘வாழ்வா சாவா’ என்ற முக்கியமான திருப்புமுனையில் உள்ளது. புரட்சித் தலைவர் எம்.ஜி.ஆர். உருவாக்கியதும், புரட்சித் தலைவி அம்மா காத்தும் வளர்த்தும் வைத்த அதிமுக இயக்கம் மீண்டும் எழுச்சி பெற வேண்டுமானால், பிரிந்து கிடக்கும் அனைத்து அணிகளும் ஒன்றிணைந்து செயல்பட வேண்டும். ஒன்றுபட்டால் மட்டுமே வெற்றி கிடைக்கும். அதுவே 2026 தேர்தலில் வெற்றியின் பாதையாகும்,” என்று அவர் உறுதியளித்துள்ளார்.