🎤🔥 ‘இது அண்ணன்–தம்பி உறவுதான்’ – பொங்கல் மோதல் குறித்து சிவகார்த்திகேயன் விளக்கம்

பராசக்தி படத்தின் பிரமாண்ட இசை வெளியீட்டு விழாவில், சிவகார்த்திகேயன், பொங்கல் வெளியீட்டில் ஜனநாயகன் படத்துடன் நேரடி போட்டி உருவானது குறித்து விரிவாகவும் வெளிப்படையாகவும் பேசினார். படம் தொடங்கிய ஆரம்ப கட்டத்திலேயே தீபாவளி அல்லது அக்டோபர் வெளியீடு குறித்து விவாதித்ததாகவும், பின்னர் அக்டோபரில் விஜய் படம் வருவதால் பொங்கல் சரியான காலமாக இருக்கும் என தயாரிப்பாளர் ஆகாஷ் தெரிவித்ததாகவும் அவர் கூறினார். அதன்படி பொங்கல் வெளியீடு முடிவான பிறகு, ‘ஜனநாயகன்’ பொங்கலுக்கு வருவதாக அறிவிப்பு வந்தது என்றும், 10 நாட்கள் விடுமுறை இருப்பதால் இரண்டு படங்கள் திரையரங்குகளில் வெற்றி பெற முடியும் என்ற நம்பிக்கையிலேயே இந்த முடிவு எடுக்கப்பட்டதாகவும் விளக்கினார்.

இந்த விஷயம் தொடர்பாக விஜய்யின் மேலாளர் ஜெகதீஷுடனும் நேரடியாக பேசியதாக கூறிய சிவகார்த்திகேயன், இது வியாபார அடிப்படையிலான முடிவே தவிர, தனிப்பட்ட முறையில் எந்தவித மனவருத்தமும் இல்லை என்று தெளிவுபடுத்தினார். விஜய் சாரிடம் அனைத்தையும் எடுத்துச் சொல்லியதாகவும், அவரும் மனமார வாழ்த்துகளை தெரிவித்ததாகவும் அவர் கூறினார். “சிலர் இதை தவறாக பேசுகிறார்கள். சிலருக்கு வன்மம், சிலருக்கு வியாபாரம். ஆனால் நிஜத்தில் எங்களுக்கு இடையே எந்த பிரச்சினையும் இல்லை” என உறுதியாக தெரிவித்தார்.

தொடர்ந்து பேசுகையில், “ஜனவரி 9-ம் தேதி அனைவரும் திரையரங்கில் ‘ஜனநாயகன்’ படத்தை கொண்டாடுங்கள். கடந்த 33 ஆண்டுகளாக ரசிகர்களை மகிழ்வித்து வரும் விஜய் சாரை கொண்டாட வேண்டும். அதேபோல் ஜனவரி 10-ம் தேதி ‘பராசக்தி’ படத்தையும் கொண்டாடுங்கள்” என ரசிகர்களிடம் வேண்டுகோள் விடுத்தார். இன்றைய சமூக வலைதள காலத்தில் உண்மை–பொய் வேறுபடுத்துவது கடினமாகி விட்டதாகவும், ஒவ்வொருவரும் அவரவர் படங்களை அவரவர் மகிழ்ச்சியாக கொண்டாட வேண்டும் என்றும் கூறினார்.

“இது அண்ணன்–தம்பி உறவு தான். அதற்கு மேல் எதுவும் இல்லை” என்ற சிவகார்த்திகேயனின் பேச்சு, விழாவில் கலந்து கொண்ட ரசிகர்கள் மற்றும் சினிமா வட்டாரங்களில் பெரும் வரவேற்பை பெற்றது. 🎬🔥