உதய்பூரில் ரகசிய திருமணமா? – ரஷ்மிகா & விஜய் தேவரகொண்டா குறித்து புதிய தகவல்

ரஷ்மிகா மந்தன்னா மற்றும் விஜய் தேவரகொண்டா ஆகியோரின் திருமணம் குறித்த செய்திகள் மீண்டும் சினிமா வட்டாரங்களில் பரபரப்பை ஏற்படுத்தியுள்ளது. ‘கீத கோவிந்தம்’ படம் வெளியான காலத்திலிருந்தே இருவருக்கும் இடையே காதல் இருப்பதாக பேசப்பட்டு வரும் நிலையில், தற்போது அவர்கள் விரைவில் திருமணம் செய்து கொள்ள உள்ளதாக தகவல்கள் வெளியாகி வருகின்றன. குறிப்பாக, பிப்ரவரி 26-ம் தேதி ராஜஸ்தானின் உதய்பூரில் திருமணம் நடைபெற உள்ளதாக கூறப்படுவது ரசிகர்களிடையே அதிக ஆர்வத்தை ஏற்படுத்தியுள்ளது.

இந்நிலையில், இந்த திருமணம் தொடர்பாக இன்னொரு முக்கிய தகவலும் வெளியாகியுள்ளது. திருமண விழாவை மிக எளிமையாக, குடும்பத்தினர் மற்றும் நெருங்கிய நண்பர்கள் மட்டுமே கலந்து கொள்ளும் வகையில் நடத்த திட்டமிடப்பட்டுள்ளதாகவும், அந்த முழு நிகழ்வும் ஆவணப்படமாக பதிவு செய்யப்பட உள்ளதாகவும் தகவல்கள் தெரிவிக்கின்றன. இந்த ஆவணப்படத்தை Netflix ஓடிடி தளத்தில் வெளியிடும் முயற்சி நடைபெற்று வருவதாக சினிமா வட்டாரங்களில் பேசப்படுகிறது.

ரஷ்மிகா தற்போது தனது திரை வாழ்க்கையின் உச்ச கட்டத்தில் இருப்பதும், ரசிகர்கள் மிகுந்த எதிர்பார்ப்புடன் காத்திருக்கும் திருமணமாக இது பார்க்கப்படுவதாலும், இந்த திருமண ஆவணப்பட உரிமை பெரிய தொகைக்கு விற்பனையாகியிருக்கலாம் என்ற பேச்சும் எழுந்துள்ளது. இதற்கு முன், நடிகை நயன்தாரா தனது திருமணத்தை ஆவணப்படமாக உருவாக்கி நெட்ஃப்ளிக்ஸில் வெளியிட்டது பெரும் கவனத்தை பெற்றது. அதே பாதையில் தற்போது ரஷ்மிகாவும் செல்ல உள்ளாரா என்ற கேள்வி சமூக வலைதளங்களில் பரவலாக பேசப்படுகிறது.

இதுவரை, பிப்ரவரி 26-ம் தேதி திருமணம் நடைபெறும் என்பதையும், ஆவணப்படம் குறித்த தகவல்களையும் ரஷ்மிகாவும் விஜய் தேவரகொண்டாவும் அதிகாரப்பூர்வமாக உறுதி செய்யவில்லை. இருப்பினும், இந்த செய்திகள் ரசிகர்களிடையே பெரும் ஆர்வத்தையும் எதிர்பார்ப்பையும் உருவாக்கி, சினிமா உலகில் ஹாட் டாபிக்காக மாறியுள்ளது.