கமலின் “மருதநாயகம்: புதிய தொழில்நுட்பத்தில் மீண்டும் உயிர் பெறுமா?”

கமல்ஹாசனின் கனவுப்படமாக கருதப்படும் மருதநாயகம், 90களில் பெரிய கோலாகலத்துடன் தொடங்கியிருந்தாலும், தொழில்நுட்ப வரம்புகள் மற்றும் மிகப்பெரிய பட்ஜெட் காரணமாக பாதியிலேயே நிறுத்தப்பட்டது. படத்தின் தொடக்க விழாவுக்கு இங்கிலாந்து ராணி எலிசபெத் வருகை தந்தது அப்போது பெரிய செய்தியாக இருந்தது.

உண்மையான பருந்து, காளை போன்றவற்றை பயன்படுத்தி கமல் முன்னோடியான தொழில்நுட்பத் தேர்வுகளை முயன்றிருந்தார். இப்படத் தடங்கல் அவர் ரசிகர்களையும், தமிழ் சினிமா உலகையும் ஏமாற்றமடையச் செய்தது. இன்றும் அவர் எங்கு சென்றாலும் மருதநாயகம் குறித்து கேள்வி எழுவது பொதுவான விஷயமாகிவிட்டது.

சமீபத்தில் வெளியான படங்களிலும் மருதநாயகத்தை ஒத்த காட்சிகள் வந்தால் கூட, “இதையெல்லாம் கமல் முன்னாடியே செய்துவிட்டார்” என்று ரசிகர்கள் குறிப்பிடுகின்றனர். சர்வதேச திரைப்பட விழாவிற்காக கோவா பயணம் செய்த கமலிடம் மீண்டும் மருதநாயகம் குறித்து கேள்வி எழுந்தபோது, “இன்றைய முன்னேறிய தொழில்நுட்பத்தால் மருதநாயகம் சாத்தியமாகலாம்” என்று அவர் நம்பிக்கை தெரிவித்தார்.

அதேசமயம், அமரன் திரைப்படம் விழாவில் திரையிடப்படுவதில் பெருமை கொள்வதாகவும், “நாட்டுக்காக எடுத்த படத்திற்கு நாடே கௌரவம் செய்கிறது” என்றும் கூறினார்.