வேகத்தை அதிகரித்த நிவர் புயல்…கரையை கடந்த போது எப்படி இருக்கும்?

0
40

நிவர் புயல் நேற்று ஐந்து கிலோ மீட்டர் வேகத்தில் நகர்ந்து வந்த நிலையில் பின்னர் 6 கிலோ மீட்டர் வேகத்திலும், 7 கிலோ மீட்டர் வேகத்திலும் நகர்ந்து வருவதாக வானிலை ஆய்வு மையம் தெரிவித்தது. தற்போது இதன் வேகம் அதிகரித்து மணிக்கு 11 கிலோ மீட்டர் வேகத்தில் நகர்ந்து வருகிறது. கரையை நெருங்கும் போது வேகம் மேலும் அதிகரிக்கும் என கூறப்பட்டுள்ளது.நிவர் புயல் தற்போது கடலூருக்கு தென் கிழக்கே 240 கி.மீ தொலைவில் மையம் கொண்டுள்ளது. புதுச்சேரியிலிருந்து 250 கிலோ மீட்டர் தொலைவிலும், சென்னையிலிருந்து 300 கிலோ மீட்டர் தொலைவிலும் மையம் கொண்டுள்ளது.

மேலும் அடுத்த 6 மணி நேரத்தில் இது அதி தீவிர புயலாக மாறும் என தெரிவிக்கப்பட்டுள்ளது. இன்று நண்பகல் கரையைக் கடக்கும் என நேற்று தெரிவிக்கப்பட்டிருந்தது. ஆனால் புயல் கரையைக் கடக்க இன்று நள்ளிரவு அல்லது நாளை அதிகாலை ஆகும் என இந்திய வானிலை ஆய்வு தெரிவித்துள்ளது.

காரைக்காலுக்கும் மகாபலிபுரத்துக்கும் நடுவே புதுச்சேரிக்கு அருகே கரையைக் கடக்கும் என தெரிவிக்கப்பட்டுள்ளது. அப்போது சென்னையில் 90 கி.மீ முதல் 100 கி.மீ வேகத்தில் காற்று வீசும் என்றும், காரைக்காலிலிருந்து புதுக்கோட்டை வரை 100 கி.மீ வரை காற்று வீசும் என தெரிவிக்கப்பட்டுள்ளது.

கரையைக் கடந்தபின் புயல் செல்லக்கூடிய பாதை குறித்த தகவல் வெளியாகியுள்ளது. விழுப்புரம் கடலோரப்பகுதிகள், திருவண்ணாமலை, வேலூர், கிருஷ்ணகிரி, தெற்கு கர்நாடகா பகுதி வழியாக செல்ல உள்ளது.கரையக் கடந்த 12 மணி நேரத்தில் வலுவிழந்து அதி தீவிர புயல் புயலாக மாறும், அதற்கடுத்து ஆழ்ந்த காற்றழுத்த மண்டலமாகவும், தமிழகத்தை விட்டு வெளியேறும்போது காற்றழுத்த மண்டலமாகவும் இருக்கும் என தெரிவிக்கப்பட்டுள்ளது.